झापा । चालु आर्थिक वर्ष २०८२/८३ को पहिलो तीन महिनामा पूर्वीनाका काँकरभिट्टाबाट आयात र राजस्व सङ्कलनमा वृद्धि भएको छ भने निर्यातमा गिरावट आएको छ । मेची भन्सार कार्यालयका अनुसार, यस अवधिमा रु १२ अर्ब २८ करोड ३० लाख बराबरका मालवस्तु आयात भएका छन् । यो गत आर्थिक वर्षको सोही अवधिको तुलनामा १३.३१ प्रतिशतले बढी हो। गत वर्ष रु १० अर्ब ८४ करोड तीन लाखको आयात भएको थियो ।
यसैगरी, कार्यालयले आयात निर्यातबाट रु चार अर्ब १५ करोड २० लाख आठ हजार राजस्व सङ्कलन गरेको छ। यो गत वर्षको तुलनामा १५.६९ प्रतिशत अर्थात् रु ५६ करोड २९ लाख ९७ हजारले बढी हो । अर्कोतर्फ, निर्यातमा भने २१.०८ प्रतिशतले गिरावट आएको छ।
चालु आवको पहिलो त्रैमासिकमा रु चार अर्ब ८० करोड ३९ लाख बराबरको सामान निर्यात भएको छ, जबकि गत आवको सोही अवधिमा रु छ अर्ब आठ करोड ६९ लाखको निर्यात भएको थियो । पूर्वीनाकाबाट निर्यात हुने मुख्य वस्तुहरूमा अलैँची, फलामे पाता, चिया, प्लाइउड, छुर्पी आदि रहेका छन् भने आयात हुने मुख्य मालवस्तुहरूमा पेट्रोलियम पदार्थ, जुट, दलहन, तरकारी, फलफूल, खनिज उत्पादन, तयारी कपडा लगायतका वस्तुहरू छन् ।
