भैरहवा। जनता समाजवादी पार्टी (जसपा), नेपालका केन्द्रीय सदस्य तथा रुपन्देही क्षेत्र नम्बर ३ का प्रतिनिधि सभा सदस्य उम्मेदवार श्रीनिवास यादव नेपाल कम्युनिष्ट पार्टी (एमाले) मा प्रवेश गर्नुभएको छ। सोमबार भैरहवामा आयोजित एक कार्यक्रममा एमालेका केन्द्रीय सदस्य भूमिश्वर ढकाल, गुमादेवी आचार्यसहितका नेताहरूले यादवलाई पार्टीमा स्वागत गर्नुभयो।
यादवले एक प्रेस विज्ञप्ति जारी गर्दै वर्तमान राष्ट्रिय परिस्थितिलाई मध्यनजर गर्दै मुलुकको राजनीतिक स्थायित्व र निकासका लागि नेकपा (एमाले) नै प्रमुख राजनीतिक शक्तिको रूपमा स्थापित हुने ठहर गर्दै जसपा नेपालको साधारण सदस्यसहित सम्पूर्ण जिम्मेवारी परित्याग गरेको घोषणा गर्नुभयो। उहाँले मतदाताको मनोभावनालाई समेत ध्यानमा राखेर यो निर्णय लिएको बताउनुभयो।
कार्यक्रममा बोल्दै एमाले केन्द्रीय सदस्य तथा लुम्बिनी प्रदेशका भौतिक पूर्वाधार विकास मन्त्री भूमिश्वर ढकालले श्रीनिवास यादवको प्रवेशले रुपन्देही-३ मा एमालेको जितलाई थप सुनिश्चित गरेको बताउनुभयो। उहाँले यो प्रवेशले अन्य क्षेत्रमा पनि सहयोग पुग्ने विश्वास व्यक्त गर्दै, २०७९ सालमा एमालेले प्रदेशका पाँचवटामध्ये तीनवटा क्षेत्र जितेको र यसपटक पाँचवटै क्षेत्र जित्ने लक्ष्य राखेको जानकारी दिनुभयो।
