काठमाडौँ । विशेष अदालतले पूर्व उपप्रधान एवं अर्थमन्त्री समेत रहेका नेकपा एमालेका उपाध्यक्ष विष्णु पौडेललाई ७ दिन थुनामा राखेर अनुसन्धान गर्न सम्पत्ति शुद्धीकरण अनुसन्धान विभागलाई अनुमति दिएको छ । विशेष अदालतका सदस्यहरू नारायणप्रसाद पौडेल, हेमन्त रावल र उमेश कोइरालाको संयुक्त इजलासले पौडेललाई सोमबारदेखि लागू हुने गरी सात दिन हिरासतमा राख्न अनुमति दिएको हो ।
अदालतको यो आदेशसँगै अब विभागले अनुसन्धानका लागि पुनः म्याद थप गर्न पौडेललाई सात दिनपछि मात्र विशेष अदालतमा उपस्थित गराउनुपर्नेछ । उपाध्यक्ष पौडेललाई आइतबार सुर्खेतबाट पक्राउ गरिएको थियो । पक्राउ परेलगत्तै उनलाई सोही राति नै स्थलमार्ग हुँदै काठमाडौँ ल्याइएको थियो भने सोमबार अदालत खुल्नासाथ म्याद थपका लागि उपस्थित गराइएको थियो । सम्पत्ति शुद्धीकरण सम्बन्धी कसुरमा अनुसन्धानका लागि म्याद थप भएसँगै विभागले उनीमाथि लागेका आरोपबारे विस्तृत छानबिन अघि बढाउने भएको छ ।
