लुम्बिनी । भारतका प्रधानन्यायाधीश भूषण रामकृष्ण गवईले नेपाल भ्रमणका क्रममा भगवान् गौतम बुद्धको जन्मस्थल लुम्बिनीको भ्रमण गर्नुभएको छ। न्यायपालिकाको सर्वोच्च जिम्मेवारी सम्हालेपछि उहाँको यो पहिलो नेपाल यात्रा हो। लुम्बिनीमा उहाँलाई लुम्बिनी विकास कोषका पदाधिकारीहरूले स्वागत गरेका थिए।
भ्रमणका क्रममा गवईले मायादेवी मन्दिर परिसरमा बुद्ध जन्मस्थलको अवलोकन गर्नुका साथै सूत्रपाठ र दियो प्रज्वलन गर्नुभएको थियो। उहाँले विश्व शान्ति, मानव कल्याण, नेपालको प्रगति र भारत-नेपाल सम्बन्ध अझ प्रगाढ होस् भन्ने कामना गर्नुभएको थियो।
लुम्बिनी विकास कोषका पदाधिकारीहरूसँगको भेटमा गवईले लुम्बिनीको गुरुयोजना र विकास निर्माणका गतिविधिहरूबारे चासो देखाउनुभएको थियो। उहाँले लुम्बिनीलाई अन्तर्राष्ट्रियस्तरमा प्रचार प्रसार गर्न नेपालले गरेका प्रयासहरूको प्रशंसा गर्दै यस क्षेत्रमा भारतको सहकार्य निरन्तर रहने विश्वास व्यक्त गर्नुभयो।
प्रधानन्यायाधीश गवई ‘नेपाल-इन्डिया जुडिसियल डाइलग’ कार्यक्रममा सहभागी हुन नेपाल आउनुभएको हो, जहाँ नेपाल र भारतका न्यायाधीश तथा विधिवेत्ताबीच न्याय क्षेत्रका चुनौती र सम्भावनाबारे छलफल भएको थियो । लुम्बिनी विकास कोषले प्रधानन्यायाधीश गवईको यस भ्रमणले लुम्बिनीमार्फत नेपालको पर्यटन, सांस्कृतिक र धार्मिक महत्वलाई अझै उच्चस्तरमा पुर्याउने विश्वास व्यक्त गरेको छ।
