अर्घाखाँची । स्वास्थ्य कार्यालय अर्घाखाँचीले पाठेघरको मुखको क्यान्सर विरुद्धको ‘एचपीभी’ खोप अभियान सञ्चालन गर्ने भएको छ । कार्यालयले आगामी माघ २७ गतेदेखि फागुन २ गतेसम्म जिल्लाभरका १० देखि १४ वर्ष उमेर समूहका किशोरीहरूलाई यो खोप लगाउने तयारी गरेको हो ।
अभियानबारे जानकारी दिन आयोजित सञ्चारकर्मीसँगको अन्तरक्रिया कार्यक्रममा बोल्दै जिल्ला खोप समन्वय समितिका संयोजक एवं जिल्ला समन्वय समिति प्रमुख जीवनारायण कोइरालाले अभियानमा शतप्रतिशत नतिजा प्राप्त गर्ने गरी लाग्न सबै सरोकारवालालाई आग्रह गर्नुभयो ।
स्वास्थ्य कार्यालयका प्रमुख कृष्णप्रसाद पोखरेलले खोप कार्यक्रमलाई प्रभावकारी रूपमा सञ्चालन गर्न सम्पूर्ण तयारी पूरा भइसकेको जानकारी दिनुभयो । उहाँका अनुसार यसपटक कक्षा ६ मा अध्ययनरत सम्पूर्ण छात्राले यो खोप लगाउने छन् । साथै, गत वर्षको अभियानमा छुटेका कक्षा ७ देखि १० सम्मका छात्रा र विद्यालय बाहिर रहेका ११ देखि १४ वर्षसम्मका किशोरीहरूलाई पनि खोप लगाउने तयारी गरिएको छ ।
सरकारले यस वर्षदेखि एचपीभी खोपलाई नियमित खोप अभियान अन्तर्गत समावेश गरेको पोखरेलले बताउनुभयो । कार्यक्रममा सन्धिखर्क नगरपालिकाका नगर प्रमुख कृष्णप्रसाद श्रेष्ठ, प्रमुख जिल्ला अधिकारी तोयनारायण सुवेदी लगायत जिल्लामा क्रियाशील सञ्चारकर्मीहरूको सहभागिता रहेको थियो ।
