भैरहवा । भैरहवाको होटल निर्वाणा लक्जरी इन्टरनेश्नल परिसरमा मध्यरातमा (राती करिब १ बजे) गोली चलेको छ । होटलको मुख्य गेट अगाडी केही व्यक्तिहरुबीच भएको वादविवाद पश्चात एउटा समूह होटलमा प्रवेश खोजेपछि सुरक्षागार्डले रोक्न खोज्दा अपरिचित व्यक्तिले सुरक्षागार्डमाथी गोली प्रहार गरेको प्रहरीले जनाएको छ ।
होटलमा सुरक्षागार्डको रुपमा कार्यरत बुटवल उपमहानगरपालिका-१५ का २७ वर्षीय मीनबहादुर परियारको तिघ्रामा गोली लागेको रुपन्देहीका प्रहरीका प्रवक्ता एवं डीएसपी सुरज कार्कीले जानकारी दिए । उनका अनुसार घाइते परियारको गएराति भीम अस्पतालमा उपचारपछि डिस्चार्ज गरिएको छ । घटनाका सम्बन्धमा अनुसन्धान भइरहेको प्रहरीले जनाएको छ । उक्त होटलमा क्यासिनोसमेत संचालनमा छ । जहाँ दैनिक बढी भारतीय नागरिक आउने जाने गर्छन् ।
