कर्णाली । कर्णाली प्रदेश सरकारका मुख्यमन्त्री यामलाल कँडेलले भूमिहीन सुकुम्वासी नागरिकको दीर्घकालीन र व्यावहारिक समाधान खोजिनुपर्नेमा जोड दिनुभएको छ । आज यहाँ आयोजित वीरेन्द्रनगर नगरपालिकाको ५०औँ स्थापना दिवस समारोहमा मुख्यमन्त्री कँडेलले सरकारी जग्गा संरक्षण र कानुन कार्यान्वयन क्रममा आमनागरिकलाई त्रसित बनाउन नहुने धारणा राख्नुभयो ।
लोकतान्त्रिक व्यवस्थामा जनताले शान्त र सुरक्षित महसुस गर्न पाउनुपर्ने उल्लेख गर्दै उहाँले सुकुम्वासी व्यवस्थापन गर्दा सोबारे ध्यान दिन सरकारसँग आग्रह गर्नुभयो । करिब दुई तिहाइ बहुमत प्राप्त सरकारले सरकारी जग्गा संरक्षण अभियान अगाडि बढाइरहेका बेला मानवीय पक्षलाई प्राथमिकतामा राख्नुपर्ने मुख्यमन्त्री कँडेलले जोड दिनुभयो । रास्वपाले आफ्नो वाचापत्र कर्णालीबाट सार्वजनिक गरेको स्मरण गराउँदै उहाँले आगामी बजेटमा यसअघि प्रदेश सरकारले सङ्घीय सरकारसमक्ष राख्दै आएका आयोजनालाई प्राथमिकताका साथ समेट्न आग्रह गर्नुभयो ।
