भैरहवा । रुपन्देहीमा सशस्त्र प्रहरीले दुई दिनको अवधिमा झण्डै ९ लाख रुपैयाँ बराबरको अवैध सामान बरामद गरेको छ। सशस्त्र प्रहरी बल, नेपाल नं. २७ गण हेडक्वार्टरबाट खटिएको टोलीले जिल्लाका विभिन्न नाकाहरूबाट अवैध रूपमा भित्र्याइएका सामग्रीहरू नियन्त्रणमा लिएको हो।
सशस्त्र प्रहरी नायव उपरीक्षक तथा सूचना अधिकारी दुर्गा बहादुर थापाका अनुसार सिद्धार्थनगर नगरपालिका–२ स्थित केवटलिया र मेउडिहवा क्षेत्रबाट ठूलो परिमाणमा लत्ताकपडा र फूलहरू बरामद गरिएको छ। भारतबाट लुकिछिपी ल्याइएको २ लाख ५७ हजार ३ सय ५० रुपैयाँ बराबरको लत्ताकपडालाई आवश्यक कारबाहीका लागि भैरहवा भन्सार कार्यालय पठाइएको छ भने बरामद गरिएका विभिन्न प्रजातिका फूलहरूलाई प्लान्ट क्वारेन्टाइन कार्यालयको रोहबरमा नष्ट गरिएको छ।
यसैगरी, सियारी गाउँपालिका–२ स्थित एक टहरामा लुकाइराखिएको ४ लाख ४० हजार रुपैयाँ बराबरको केरा र ढुवानीमा प्रयोग गरिएको एक थान मोटरसाइकल समेत प्रहरीले नियन्त्रणमा लिएको छ। बरामद केरालाई खाडलमा पुरी नष्ट गरिएको छ भने मोटरसाइकललाई कारबाहीका लागि भन्सार कार्यालय बुझाइएको सशस्त्र प्रहरीले जनाएको छ। दुई दिनको यस कारबाहीमा कुल ८ लाख ७७ हजार ३ सय ५० रुपैयाँ बराबरको सामान बरामद भएको छ।
