भैरहवा । रुपन्देहीको ओमसतिया गाउँपालिकामा मंगलबारदेखि ‘तेस्रो उपाध्यक्ष कप महिला भलिबल प्रतियोगिता’ को औपचारिक सुरुवात भएको छ । स्थानीय महिलाहरूलाई खेलकुदको माध्यमबाट जोड्दै उनीहरूको सशक्तिकरण गर्ने र लुकेको प्रतिभा प्रस्फुटन गराउने उद्देश्यका साथ गाउँपालिकाले यो प्रतियोगिताको आयोजना गरेको हो ।
गाउँपालिकाकी उपाध्यक्ष सुनिता चौधरीले घरभित्रको कामकाज र चुलोचौकोमा मात्र सीमित रहेका दिदीबहिनीहरूलाई घरबाहिर ल्याएर उनीहरूको आत्मविश्वास बढाउनु नै प्रतियोगिताको मुख्य लक्ष्य रहेको बताइन् । उनले महिलाहरूलाई सामाजिक गतिविधि तथा खेलकुदमा पनि अब्बल बनाउन यस्ता कार्यक्रमले महत्वपूर्ण भूमिका खेल्ने धारणा राखिन् ।
प्रतियोगिताका संयोजक कमल प्रसाद शर्माका अनुसार प्रतियोगितामा गाउँपालिकाभित्रका कुल ८ वटा टोलीले सहभागिता जनाएका छन् । जसमा वडा नम्बर १ बाट दुईवटा टोली, अन्य वडाहरूबाट एक–एक वटा टोली र गाउँपालिकामा कार्यरत महिला कर्मचारीहरूको एउटा टोलीबीच प्रतिस्पर्धा हुँदैछ । प्रतियोगिताको विजेता टोलीले नगद ३० हजार रुपैयाँ र उपविजेताले २० हजार रुपैयाँ पुरस्कार प्राप्त गर्नेछन् ।
बुधबारसम्म चल्ने यो प्रतियोगिताले महिलाहरूलाई सामाजिक तथा खेलकुदका गतिविधिमा सक्रिय हुन थप प्रोत्साहन मिल्ने विश्वास लिइएको छ । प्रतियोगिताको उद्घाटन सत्रमा गाउँपालिका अध्यक्ष मन्जित कुमार यादव र प्रवक्ता मदन प्रसाद पोखरेल लगायतले आ–आफ्नो धारणा राखेका थिए ।
