भैरहवा । नेपाल वायुसेवा निगमले भैरहवास्थित गौतम बुद्ध अन्तर्राष्ट्रिय विमानस्थललाई आफ्नो 'अपरेटिङ बेस' बनाउने तयारी थालेको छ। संस्कृति, पर्यटन तथा नागरिक उड्डयन मन्त्रालयको निर्देशन अनुसार निगमले मङ्गलवारदेखि एयरबस ३२० जहाजमार्फत आफ्ना फर्स्ट अफिसर (पाइलट) हरूलाई बेस ट्रेनिङ फ्लाइट सञ्चालन गर्न थालेको हो।
गौतम बुद्ध अन्तर्राष्ट्रिय विमानस्थल नागरिक उड्डयन कार्यालयका प्रवक्ता इन्जिनियर कुमार सुजखुका अनुसार साउन २७ देखि भदौ ३ गतेसम्म यो प्रशिक्षण उडान सञ्चालन हुनेछ। यसअघि नै निगमले २०८२ मङ्सिर ३ गतेदेखि लागू हुने गरी आफ्ना जहाज डाइभर्ट गर्नुपर्ने अवस्थामा यस विमानस्थललाई वैकल्पिक विमानस्थलका रूपमा प्रयोग गर्ने निर्णय गरिसकेको निमित्त महाप्रबन्धक श्याम किशोर साहले जानकारी दिनुभयो।
२०२१ सालमा घाँसे मैदानबाट सुरु भई २०२३ सालदेखि आन्तरिक विमानस्थलका रूपमा सञ्चालनमा आएको यो विमानस्थललाई करिब रु ३५ अर्बको लागतमा अन्तर्राष्ट्रिय स्तरको बनाइएको हो। २०७९ जेठ २ गते उद्घाटन गरिएको यो विमानस्थल करिब आठ सय बिघामा फैलिएको छ भने यहाँ तीन किलोमिटर लामो रनवे रहेको छ। त्रिभुवन अन्तर्राष्ट्रिय विमानस्थल सरहको उडान–अवतरण क्षमता रहेको यस फोर–ई क्याटेगरीको विमानस्थलमा एकैपटक एउटा वाइडबडी र चार वटा न्यारोबडी गरी पाँच वटा अन्तर्राष्ट्रिय जहाज पार्किङ गर्न सकिने सुविधा छ।
