गोरखा । जिल्ला प्रहरी कार्यालय गोरखाले आफ्नो हिरासत कक्षलाई स्तरोन्नति गरी बन्दीहरूको मानव अधिकार अनुकूल बनाएको छ । अन्तर्राष्ट्रिय मानव अधिकार दिवसको अवसर पारेर कार्यालयले हिरासतमा रहेका थुनुवाहरूको सहजता र सुरक्षाका लागि भौतिक पूर्वाधार तथा सेवा सुविधामा सुधार गरेको हो ।
जिल्ला प्रहरी प्रमुख एसपी भरत बिकका अनुसार हिरासत कक्षको स्तरोन्नतिसँगै अब बन्दीलाई भेट्न आउने आफन्तले घरबाटै ओढ्ने तथा ओछ्याउने कपडा बोकेर आउनुपर्ने बाध्यता सधैँका लागि अन्त्य भएको छ । प्रहरीले बन्दीहरूको मानव अधिकारको सम्मान गर्दै हिरासत कक्षलाई पूर्ण रूपमा सरसफाइ गरेको छ भने चिसो मौसमलाई ख्याल गर्दै न्यानो ओढ्ने र ओछ्याउने कपडाको व्यवस्था मिलाएको छ । यसका साथै हिरासतमा बस्नेहरूका लागि तातो–चिसो पानी, पानी राख्ने थर्मस र लगाउनका लागि टिसर्ट लगायतका आवश्यक सामग्रीहरूको सुविधा समेत उपलब्ध गराइएको छ ।
हिरासत कक्षको यो सुदृढीकरण कार्यका लागि स्थानीय सरकारले आर्थिक सहयोग उपलब्ध गराएको थियो। गोरखा नगरपालिका र आरुघाट गाउँपालिकाबाट प्राप्त भएको कुल ३ लाख ९४ हजार रुपैयाँ आर्थिक सहयोगबाट हिरासत कक्षमा रङ्गरोगन गर्नुका साथै थप सेवा सुविधाहरू जडान गरिएको एसपी बिकले जानकारी दिए ।
हिरासतमा रहेका व्यक्तिहरूको मौलिक अधिकार, स्वास्थ्य, सुरक्षा र मानव अधिकार संरक्षण गर्ने उद्देश्यले यो सुधार गरिएको हो । एसपी बिकले विगतको तुलनामा अहिलेको हिरासतको अवस्थामा धेरै अन्तर आएको बताए । आर्थिक सहयोग जुटाएर गरिएको यस स्तरोन्नतिपछि अब थुनुवाहरूले आधारभूत सुविधाकै लागि पनि कष्ट भोग्नु नपर्ने र हिरासत बसाई मानव अधिकारमैत्री भएको प्रहरीले जनाएको छ।
