परासी । जिल्ला प्रहरी कार्यालय नवलपरासी (बर्दघाट सुस्ता पश्चिम) ले प्रतिबन्धित लागुऔषधसहित दुई जनालाई नियन्त्रणमा लिएको छ। बर्दघाट नगरपालिका–१० स्थित लण्डनब्रिज नजिकै रहेको संगम रुफटप रेष्टुरेन्ट एण्ड खाजाघरमा लागुऔषधको कारोबार भइरहेको भन्ने विशेष सूचनाका आधारमा खटिएको इलाका प्रहरी कार्यालय बर्दघाटको टोलीले उनीहरूलाई गए राति पक्राउ गरेको हो।
पक्राउ पर्नेहरूमा बर्दघाट–१० का ६१ वर्षीय धनलाल चापागाई र सुस्ता गाउँपालिका–५ थारुटोलका ३३ वर्षीय स्तकार हुसेन रहेका छन्। प्रहरीले हुसेनको साथबाट ४ प्याकेट एमडी सिन्थेटिक ड्रग्स बरामद गरेको छ, जसको नेट तौल २०८.१६० मिलिग्राम रहेको छ। जिल्ला प्रहरी कार्यालयका सूचना अधिकारी एवं प्रहरी नायब उपरीक्षक बीर दत्त पन्तका अनुसार, पक्राउ परेका दुवै व्यक्तिमाथि लागुऔषध सम्बन्धी कसूरमा जिल्ला अदालतबाट म्याद थप गरी आवश्यक अनुसन्धान अगाडि बढाइएको छ।
