बुटवल । रुपन्देहीको तिलोत्तमा नगरपालिका, स्थानीय तह संस्थागत क्षमता स्वमूल्याङ्कन (लिसा) मा आर्थिक वर्ष २०८०/०८१ को कार्यसम्पादन नतिजामा देशकै दोस्रो उत्कृष्ट बनेको छ । सङ्घीय मामिला तथा सामान्य प्रशासन मन्त्रालयले सार्वजनिक गरेको नतिजा अनुसार तिलोत्तमा लुम्बिनी प्रदेशमा भने पहिलो स्थानमा रहन सफल भएको छ । नगरपालिकाले अघिल्लो आर्थिक वर्षको दोस्रो स्थानलाई यस वर्ष पनि कायम राखेको हो ।
मन्त्रालयको सूचना अनुसार, चितवनको खैरहनी नगरपालिका देशकै उत्कृष्ट हुँदै प्रथम स्थानमा आएको छ भने अघिल्लो वर्ष प्रथम भएको धादिङको नीलकण्ठ नगरपालिका यस पटक तेस्रो स्थानमा झरेको छ । त्यसैगरी, स्याङ्जाको अर्जुन चौपारी गाउँपालिका चौथो, धादिङको बेनीघाट गाउँपालिका पाँचौँ र गुल्मीको रुरुक्षेत्र गाउँपालिका छैटौँ स्थानमा छनोट भएका छन् ।
स्थानीय तहको कार्यप्रक्रिया, उपलब्धि र शासकीय सुशासनको आवधिक समीक्षा गरी सुधारका क्षेत्र पहिचान गर्न लिसा मूल्याङ्कन गर्ने गरिन्छ । यस अवसरमा नगर प्रमुख रामकृष्ण खाँणले सफलताको लागि योगदान पुर्याउने सम्पूर्ण जनप्रतिनिधि, प्रमुख प्रशासकीय अधिकृत नारायण अर्याल, कर्मचारी, नगरवासी र अन्य सबै सरोकारवालाहरूलाई आभार व्यक्त गर्नुभएको छ । छनोट भएका उत्कृष्ट पालिकाहरूलाई यही भाद्र ६ गते सङ्घीय मामिला तथा सामान्य प्रशासन मन्त्रालयले मन्त्री भगवती न्यौपानेको उपस्थितिमा सम्मान गर्ने कार्यक्रम तय गरेको छ ।
