सुदूरपश्चिम । सुदूरपश्चिम प्रदेशमा आगामी फागुन २१ गते हुने निर्वाचनलाई निष्पक्ष, पारदर्शी र भयरहित वातावरणमा सम्पन्न गराउन सशस्त्र प्रहरी बलले सुरक्षा व्यवस्था कडा पारेको छ। सशस्त्र प्रहरी बल नेपाल नम्बर ७ वैद्यनाथ बाहिनी मुख्यालयका अनुसार प्रदेशका नौवटै जिल्लाका १६ निर्वाचन क्षेत्रमा करिब ५,१०० सशस्त्र तथा निर्वाचन प्रहरी परिचालन गर्ने गरी विशेष सुरक्षा योजना लागू गरिएको छ। हाल निर्वाचन अधिकृतका कार्यालयहरूमा सुरक्षाकर्मी तैनाथ भइसकेका छन् भने डीएसपीको नेतृत्वमा 'निर्वाचन क्षेत्र सुरक्षा बेस' स्थापना गरी सुरक्षा व्यवस्था थप सुदृढ बनाइनेछ।
निर्वाचन सुरक्षालाई प्रभावकारी बनाउन फागुन ६ गतेदेखि नै स्ट्राइकिङ र मोबाइल टोलीहरू परिचालन भइसकेका छन् भने रिजर्भ र क्युआरटी टोलीहरूलाई तयारी अवस्थामा राखिएको छ। पहाडी तथा विकट जिल्लाहरूमा हुन सक्ने निर्वाचन विरोधी गतिविधि रोक्न वरिष्ठ अधिकारीहरूको नेतृत्वमा अनुगमन टोली खटाइएको छ भने सञ्चार सम्पर्कका लागि थप रिपिटर टावर र सवारी साधनको व्यवस्थापन गरिएको छ। अन्य सुरक्षा निकायहरूसँगको निरन्तर समन्वयका साथै सामाजिक सञ्जालबाट फैलन सक्ने गलत सूचना नियन्त्रण गर्न विशेष निगरानी संयन्त्र तयार पारी सशस्त्र प्रहरी बलले आफ्नो सम्पूर्ण तयारी पूरा गरेको छ।
