भैरहवा । नापी कार्यालय रुपन्देहीले सिद्धार्थनगर नगरपालिका वडा नम्बर ४ मा गाउँब्लक जग्गाको जगाधनी दर्ता प्रमाणपूर्जा (लालपूर्जा) वितरण गरेको छ । सिद्धार्थनगर नगरपालिका वडा नम्बर ४ को कार्यालय र नापी कार्यालय रुपन्देहीको आयोजनामा बुधबार वडा नम्बर ४ का स्थानीयहरुलाई जग्गाधनी दर्ता प्रमाणपूर्जा बुधबार वितरण गरिएको हो ।
सिदार्थनगर नगरपालिकाका प्रमुख (मेयर) इश्तियाक अहमद खाँको प्रमुख आतिथ्यतामा दोगहरा धर्मशालामा आयोजित समारोहमा लालपूर्जा वितरण गरिएको वडाअध्यक्ष मुक्तिनाथ यादव (भोला) ले जानकारी दिए । १५६ घरधुरीमध्ये १०२ जनाको पूर्जा वितरण गरिएको र बाँकी पूर्जा आगामी असार २५ गते वडा समितिको कार्यालयमा गएर लिन अध्यक्ष यादवले स्थानीयलाई अनुरोध गरे । उनले पूर्जा कसैले पाएको र कसैले नपाउँदा दुःख नमानी ढुक्कसँग बस्न आग्रह गर्दै सबैले पूर्जा पाउने प्रतिवद्धता जनाए ।
सिद्धार्थनगर नगरपालिकाका प्रवक्ता समेत रहेका यादवले भने, ‘म पटकपटक भन्छु, म तपाईहरुको शासक होइन सेवक बनेर आएको हुँ । म नेता होइन, म वडा नम्बर ४ को छोरा हुँ । ’
त्यस्तै नापी कार्यालय रुपन्देहीका प्रमुख नापी अधिकृत सुग्रिम यादवले लालपूर्जा पाउने सबैलाई बधाइ दिए । बजेट नभइ काम गर्न गाह्रो भएको बेला ४ नम्बर वडाका अध्यक्ष मुक्तिनाथ यादवले म बजेट छुट्टयाउछु, जसरी भए पनि वडा नम्बर ४ का स्थानीयहरुलाई पूर्जा वितरण गर्दिनुस् भनि आग्रह गरेपछि हामीलाई पूर्जा वितरण गर्न सहज भएको हो, ’उनले भने ।
समारोहमा सिद्धार्थनगर–२ का वडाअध्यक्ष छेदीलाल श्रीवास्तव, ३ का वडाअध्यक्ष नारायण प्रसाद उपाध्याय, इन्द्रमती धोबी, सइद अहमद धुनिया, अर्जुन गुरुङ्ग, अहमद हुसेन, परशुराम यादव, नापीका कर्मचारी सन्दीप ढकाललगायतको उपस्थिति रहेको थियो ।
