रास्वपाको समानुपातिक सूचीमा ९,८३५ मतसहित दाङकी ‘जेन जी’ नर्स खिमा वि.क.

दाङ । "कागजमा मात्र होइन कार्यान्वयनको प्रतिवद्दता" भन्ने मूल नारासहित राजनीतिमा होमिएकी दाङकी २६ वर्षीया नर्स खिमा वि.क. राष्ट्रिय स्वतन्त्र पार्टी (रास्वपा) को प्रतिनिधि सभा समानुपातिक सदस्यको बन्दसूचीमा पर्न सफल भएकी छिन्। दाङको दङ्गीशरण गाउँपालिका–२ की स्थायी बासिन्दा खिमाले रास्वपाको लोकतान्त्रिक अभ्यास अन्तर्गत भएको ‘प्रारम्भिक निर्वाचन’ मा देशभरका पार्टी सदस्यहरूबाट ९,८३५ मत प्राप्त गर्दै उत्कृष्ट नतिजा हासिल गरेकी हुन्।

यो जनसमर्थनसँगै उनी आगामी २०८२ सालको निर्वाचनका लागि दलित महिला तर्फ दाङबाट एकल सिफारिसमा पर्दै बन्दसूचीमा स्थान सुरक्षित गर्न सफल भएकी छिन्। स्वास्थ्य पेसामा रहँदा देखेका बेथितिहरूलाई नजिकबाट नियालेकी खिमाले सुलभ स्वास्थ्य सेवा, सुशासन, समानता र श्रमको सम्मानलाई आफ्नो मुख्य राजनीतिक एजेन्डा बनाएकी छिन् ।

परम्परागत राजनीतिभन्दा फरक सोच राख्ने उनले योजनालाई कागजमा मात्र सीमित नराखी कार्यान्वयनमा लैजानुपर्ने र त्यसका लागि अबको नेतृत्व ‘जेन जी’ (Gen Z) पुस्ताले लिनुपर्नेमा जोड दिएकी छिन्। युवा जोश, वौद्धिकता र स्वास्थ्य क्षेत्रको अनुभव संगालेकी खिमाको उम्मेदवारीलाई दाङमा निकै आशा र चासोका साथ हेरिएको छ।