बारा । बारा प्रहरीले ७५० लिटर अबैध घरेलु मदिरा नियन्त्रणमा लिइ नष्ट गरेको छ । जिल्ला प्रहरी कार्यालय तथा मातहतबाट खटिएको प्रहरी टोलीले बिभिन्न सवारी साधनहरू रोकि चेक जाँच गर्ने क्रममा घरेलु मदिरा बरामद गरेको हो ।
हेटौंडाबाट वीरगंज तर्फ आउँदै गरेको बिभिन्न सवारी साधनहरू रोकि चेक जाँच गर्दा लुकाई छिपाई राखेको २५ पोका र ५ ओटा जर्किनको घरेलु मदिरा बारामद गरेको जिल्ला प्रहरी कार्यालय बाराका सूचना अधिकारी प्रहरी नायव उपरिक्षक प्रकाश सापकोटाले बताए ।
उनका अनुसार प्रहरी टोलीले जीतपुर सिमरा उप–महानगरपालिका वडा नं. २१ अमलेखगंज चोक बिभिन्न सवारी साधनहरू रोकि चेक जाँच गर्दा घरेलु मदिरा भएको हो । बरामद गरिएका मदिरा तथा कच्चा पदार्थ स्थानिय भद्रभलादमीको रोहवरमा नष्ट गरीएको उनले जानकारी दिए ।
जिल्लाभर रहेका अस्थाई प्रहरी चौकी, प्रहरी चौकी र ईलाका प्रहरी कार्यालयबाट खटिएर प्रहरीले अवैध घरेलु मदिरा बरामद गर्ने गरेको जिल्ला प्रहरी कार्यालय बाराले जनाएको छ ।
घरेलु मदिराले समाजमा विकृति र आपराधिक घटना निम्त्याउन थालेपछि नियन्त्रणमा कडाइ गरिएको प्रहरीको भनाई छ । गैरकानूनीरूपमा घरेलु मदिरा उत्पादन र बिक्री वितरण नगर्न बारा प्रहरीले अनुरोध गर्दै आएको छ ।
