पाल्पा । लुम्बिनी प्रदेशका स्वास्थ्य मन्त्री खेम बहादुर सारुले ग्रामीण क्षेत्रमा उत्पादन हुने सामग्रीको वृद्धि गरी आयातभन्दा निर्यातमा ध्यान दिनुपर्ने बताउनुभएको छ। पाल्पाको निस्दी-६, अर्चलेस्थित देउराली सामुदायिक विकास बहुउद्देश्यीय सहकारी संस्था लिमिटेडको १९औं वार्षिक साधारणसभालाई शनिबार सम्बोधन गर्दै मन्त्री सारुले सो कुरा बताउनुभएको हो ।
मन्त्री सारुले आर्थिक आयवृद्धिका लागि स्थानीय उत्पादन महत्त्वपूर्ण रहेको उल्लेख गर्दै स्वास्थ्यप्रति सचेत रहन र खानपिनमा ध्यान दिन सुझाव दिनुभयो। उहाँले प्रदेश सरकारले स्वास्थ्य बीमा र दीर्घ रोगीहरूको उपचारका लागि सहज वातावरण बनाउन पहल गरिरहेको जानकारी दिँदै निस्दी गाउँपालिकाले सञ्चालन गरेको बालविवाह विरुद्धको अभियानको प्रशंसा गर्नुभयो ।
कार्यक्रममा निस्दी गाउँपालिकाका अध्यक्ष मुक्त बहादुर सारुले जमिन बाँझो नराखी कृषि र कफी खेतीमा लगानी गर्न जोड दिनुभयो। त्यस्तै, जिल्ला सहकारी संघ पाल्पाका अध्यक्ष भुपति पाण्डेयले कर्जाको सही सदुपयोग गर्न र वडा अध्यक्ष मेख बहादुर सुनारीले स्थानीय उत्पादनको बजारीकरणमा सहकारीले भूमिका खेल्नुपर्ने बताउनुभयो ।
संस्थाका व्यवस्थापक अर्जुन बयम्बुले ४ करोड १५ लाख ९४ हजार रुपैयाँ बराबरको आर्थिक प्रतिवेदन प्रस्तुत गर्नुभएको उक्त साधारणसभामा उत्कृष्ट राष्ट्रसेवक कर्मचारीहरू नेत्र फाल र अनुपा राई, उत्कृष्ट बचतकर्ता, उद्यमी, असल ऋणी र १२ जना जेष्ठ नागरिकलाई सम्मान गरिएको थियो। साथै, १२ जना विद्यार्थीहरूलाई छात्रवृत्ति समेत प्रदान गरिएको थियो।संस्थाका अध्यक्ष टेक बहादुर सोमैको अध्यक्षतामा सम्पन्न कार्यक्रमको सञ्चालन सचिव होम राई मगरले गर्नुभएको थियो।
