बाजुरा । बाजुराको बडिमालिका नगरपालिका वडा नम्बर ७ र ८ स्थित दुई विद्यालयमा विद्यार्थीहरूका लागि साइबर अपराध, बाल विवाह र बाल यौन दुर्व्यवहार सम्बन्धी सचेतनामुलक कार्यक्रम सम्पन्न भएको छ । जिल्ला प्रहरी कार्यालय बाजुराका प्रहरी निरीक्षक गगनसिंह भाट र नरेश बहादुर शाहीको नेतृत्वमा वडा नं. ७ को ज्ञानोदय माध्यमिक विद्यालय, रजातोली र वडा नं. ८ को मालिका माध्यमिक विद्यालय, मार्तडीमा अध्ययनरत छात्रछात्राहरूलाई लक्षित गरी उक्त कार्यक्रम आयोजना गरिएको हो ।
कार्यक्रममा पछिल्लो समय चुनौतीका रूपमा देखा परेका साइबर अपराध, समाजमा व्याप्त बाल विवाह र बाल यौन दुर्व्यवहारका विषयमा विद्यार्थीहरूलाई सचेत गराइएको थियो । जिल्ला प्रहरी कार्यालयबाट खटिएका प्रहरी अधिकारीहरूले प्रविधिको सही प्रयोग, कानुनी प्रावधान र यस्ता हिंसा तथा अपराधबाट बच्ने उपायहरूबारे जानकारी दिँदै बालबालिकालाई जागरुक गराउनुभएको थियो । उक्त कार्यक्रममा विद्यालयका शिक्षक र विद्यार्थीहरूको उल्लेख्य सहभागिता रहेको थियो ।
