दाङ । प्रधानमन्त्री पुष्पकमल दाहालले क्रान्तिकारी नेतृत्वले नै शान्तिको आवश्यकता र महत्व सबैभन्दा बढी बुझ्ने बताएका छन् । लुम्बिनी प्रदेश सभाको हिउँदे अधिवेशनलाई आज सम्बोधन गर्दै उनले नेपालको राजनीतिक इतिहासमा क्रान्ति र शान्ति दुवैको नेतृत्व गर्ने अवसर प्राप्त भएको भन्दै क्रान्ति गर्नेले मात्रै शान्तिको महत्वलाई गहिरोगरी बुझ्ने बताए ।
दाहालले भने, ‘हामीले गौरव गर्नुपर्छ । नेपालको राजनीतिक इतिहासमा हामी मात्रै त्यस्तो शक्ति र नेतृत्व हौँ, जसले क्रान्ति र शान्ति दुवैको नेतृत्व गर्ने अवसर प्राप्त ग¥यौँ, त्यसैले मैले भन्ने गरेको छु, जसले क्रान्तिको नेतृत्व गर्दछ, शान्तिको आवश्यकता र महत्व पनि त्यसले नै सबैभन्दा बढी बुझ्न सक्छ ।’
प्रधानमन्त्रीले विश्वशान्तिका अग्रदूत गौतमबुद्धको जन्मभूमि लुम्बिनी शान्तिको उद्गमभूमि र पुण्यभूमिका रूपमा मात्रै परिचित नभएर क्रान्तिकारी आन्दोलन सुरु गर्ने स्थान पनि भएको चर्चा गरे ।
उनले भने, ‘विश्वशान्तिका अग्रदूत गौतमवुद्धको जन्मभूमि लुम्बिनी शान्तिको उद्गमभूमि र पुण्यभूमिका रूपमा मात्रै परिचित नभएर क्रान्तिकारी आन्दोलन नेतृत्व, अग्रगमन र परिवर्तनका नामले समेत उत्तिकै परिचित छ, क्रान्ति र शान्तिको समीश्रणको सबैभन्दा राम्रो दृष्टान्त लुम्बिनी नै हो ।’
यसको साथै, बुद्धभूमिको ‘ब्राण्डिङ’ गर्ने, पर्यटनमैत्री नीति र कानुनहरू निर्माण गर्ने, पर्यटन पूर्वाधार विकास गर्ने र पर्यटनमार्फत प्रदेशको विकास र समृद्धिमा गुणात्मक फड्को मार्नेतर्फ सोच्नुपर्नेमा उनले जोड दिएका छन् ।
