मचर्वार । रुपन्देहीको मर्चवारीमाई गाउँपालिकाले आफ्नो १९औं हिउँदे अधिवेशन सम्पन्न गरेको छ। अधिवेशनमा चालु आर्थिक वर्षका योजनाहरूको प्रगति समीक्षा गर्नुका साथै आवश्यकता र प्राथमिकताका आधारमा केही योजनाहरूमा बजेट रकमान्तरण गरिएको छ।
गाउँपालिका अध्यक्ष गया प्रसाद बरईले जनताको आवश्यकतालाई ध्यानमा राख्दै बजेट संशोधन गरिएको र जनतासँग गरेको वाचा अनुसार गाउँपालिकाको प्रशासकीय भवन निर्माणका लागि २–४ दिनभित्रै टेन्डर प्रक्रिया अगाडि बढाइने जानकारी दिनुभयो।
प्रमुख प्रशासकीय अधिकृत उपमन्यु त्रिपाठीले गाउँपालिकालाई समृद्ध, सुशासित र जनमैत्री बनाउन निरन्तर काम भइरहेको बताउनुभयो। अधिवेशनमा वडा अध्यक्ष तथा सदस्यहरूले विकास निर्माण, शिक्षा, स्वास्थ्य लगायतका विषयमा सुझाव राखेका थिए। गाउँपालिकाले आगामी दिनमा सुशासन र पारदर्शितालाई प्राथमिकता दिँदै विकास निर्माणलाई तीव्रता दिने प्रतिबद्धता व्यक्त गरेको छ।
