पोखरा । पोखराको समावेशी, दीर्घकालीन र दिगो विकासका लागि नेपाली कांग्रेस कास्कीले तयार पारेको ‘पोखरा फर चेन्ज ः भिजन, भ्यालु एन्ड भ्वाइस’ शीर्षकको अवधारणा पत्र आज सार्वजनिक गरिएको छ ।आज पत्रकार सम्मेलनमार्फत सार्वजनिक गरिएको उक्त दस्तावेज पोखरालाई सुशासन, नवप्रवर्तन र समावेशी योजनामार्फत आधुनिक शहरको रुपमा विकास गर्ने उद्देश्यले तयार गरिएको हो ।
नेपाली कांग्रेस कास्कीका अनुसार यो अवधारणा पत्र कुनै पार्टीगत घोषणापत्र नभई पोखराका नागरिक, युवा र विज्ञहरुको सुझाव तथा सरोकारमा आधारित साझा सपना भएको जनाएको छ ।पोखराको दीर्घकालीन रूपान्तरणका लागि गरिएको यस अध्ययनमा देश(विदेशमा रहेका ५३५ जना सहभागी भएका थिए ।
तीमध्ये २५० जना भौतिक अन्तरक्रियामार्फत, १२७ जना अनलाइन फारम, ८२ जना मेसेन्जर र ७६ जना इमेलमार्फत सहभागी भएका थिए । कांग्रेस कास्कीले प्रस्तुत गरेको अवधारणा पत्रमा पोखराको विकासलाई पूर्वाधार र सौन्दर्यीकरणमा मात्रै सीमित नगरी सुशासन, मानव पूंजी र प्रविधिमा आधारित योजनाहरुमा जोड दिइएको छ ।
