अर्घाखाँची । नेपाली कांग्रेस अर्घाखाँचीले आगामी माघ ११ गते हुने राष्ट्रिय सभा र फागुन २१ गते हुने प्रतिनिधि सभा निर्वाचनका लागि उम्मेदवारहरूको नाम सिफारिस गरेको छ। प्रतिनिधि सभाको प्रत्यक्षतर्फ पूर्वमन्त्री रेवती प्रसाद भुसाल, पूर्व सभापति कमल प्रसाद भुसाल, विष्णु प्रसाद खनाल 'मुस्कान' र लेखनाथ पोख्रेलसहित ८ जनाको नाम केन्द्रमा पठाइएको छ।
यस्तै, समानुपातिकतर्फ प्रभावशाली नेतृ पुष्पा गौतम भुसालले यसपटक 'सेफ जोन' रोज्दै प्रत्यक्षबाट पछि हटेर उम्मेदवारी दर्ता गराउनुभएको छ भने उहाँसँगै निर्मला क्षेत्रीसहित ६ जना सिफारिसमा पर्नुभएको छ। राष्ट्रिय सभाका लागि डा. रामबहादुर बिसी, पिताम्बर शर्मा भुसाल र बालकृष्ण पाण्डेको नाम तय गरिएको छ । आकांक्षीको संख्या अत्यधिक भएपछि जिल्ला सभापति केशव श्रेष्ठले केन्द्रीय मापदण्डभन्दा केही बढी नाम सिफारिस गर्नुपरेको जानकारी दिनुभएको छ।
