सोनौली । भारतीय सीमा सुरक्षा बल (एसएसबी) ले भारत महराजगंजको सोनौलीस्थित मंगरहिया बजार क्षेत्रबाट नेपाल हुँदै तस्करी गरी लगिएको ठूलो परिमाणमा विदेशी मकै र किसमिस बरामद गरेको छ। नेपालबाट अवैध रूपमा सामान भित्र्याई भारतका विभिन्न महानगरहरूमा पठाउने तयारी भइरहेको विशेष सूचनाका आधारमा एसएसबी २२औं वाहिनीको टोलीले यो कारबाही गरेको हो।
सीमा स्तम्भ ५१७/१ बाट करिब २०० मिटर भित्र भारतीय क्षेत्रमा गरिएको खानतलासीका क्रममा १० बोरा (२५० किलो) मकै र ४९ कार्टुन (४९० किलो) किसमिस फेला परेको थियो। सई हरेन्द्र गोगोईको नेतृत्वमा खटिएको विशेष टोलीले बरामद गरेका ती सामग्रीहरू आवश्यक कारबाहीका लागि नौतनवा भन्सार कार्यालयमा बुझाइएको एसएसबीका असिस्टेन्ट कमान्डेन्ट सी. विवेकले जानकारी दिएका छन्।
तस्करहरूले तेस्रो मुलुकबाट सस्तो दरमा ल्याइएका सामान नेपालको बाटो हुँदै भारत पुर्याएर महँगो मूल्यमा बेच्ने गरेको पाइएको छ। पछिल्लो समय रुपन्देहीका विभिन्न सीमा नाकाहरूबाट रातिको समयमा तस्करी मौलाएको स्थानीयहरूले बताएका छन्। भारतमा बरामद भएको यो ठूलो परिमाणको सामानले पनि सीमा क्षेत्रमा अवैध गतिविधि बढेको र नाकाबाट निर्वाध रूपमा तस्करी भइरहेको कुरालाई पुष्टि गरेको छ।
