बारा । नेपाल प्रहरी श्रीमती संघले बारा जिल्लाका अति विपन्न परिवारहरूलाई न्यानो कपडा (कम्बल) वितरण गरेको छ । संघले बाराको महागढीमाई नगरपालिका र करैया गाउँपालिका क्षेत्रभित्र बसोबास गर्ने दुई सय जना अति विपन्न परिवारलाई बढ्दो जाडोबाट बच्न सहयोग स्वरूप कम्बल वितरण गरेको हो ।
नेपाल प्रहरी श्रीमती संघका अध्यक्ष नविना खत्री कार्कीको प्रमुख अध्यक्षतामा सम्पन्न भएको उक्त राहत वितरण कार्यक्रममा नेपाल प्रहरीका संगठन प्रमुख, प्रहरी महानिरीक्षकको विशिष्ट आतिथ्यता रहेको थियो । कार्यक्रममा बोल्दै वक्ताहरूले सामाजिक उत्तरदायित्व अन्तर्गत प्रहरी र प्रहरी परिवारले समाजका दीनदुःखीलाई सहयोग गर्नु सराहनीय कार्य भएको बताएका थिए ।
कार्यक्रममा मधेश प्रदेश प्रहरी कार्यालय जनकपुरधामका प्रमुख प्रहरी नायव महानिरीक्षक गोविन्द थपलिया तथा नेपाल प्रहरी श्रीमती संघका सचिव (प्रशासन) एवं मधेश प्रदेश प्रहरी श्रीमती संघका अध्यक्ष वरुणा बडाल थपलियाको उपस्थिति रहेको थियो । साथै, स्थानीय सरकारको तर्फबाट महागढीमाई नगरपालिकाका प्रमुख उपेन्द्र प्रसाद यादव र उपप्रमुख तारा देवी कानुको समेत विशेष सहभागिता थियो । उक्त अवसरमा अन्य प्रहरी कर्मचारीहरू, स्थानीय जनप्रतिनिधि, विभिन्न सञ्चार माध्यमका संचारकर्मी तथा स्थानीयहरूको समेत उपस्थिति रहेको थियो । चिसो मौसममा न्यानो कपडा प्राप्त गरेपछि लाभान्वित विपन्न परिवारहरूले खुसी व्यक्त गरेका थिए ।
