भैरहवा । निर्माण व्यवसायीहरुको छाता संगठन लुम्बिनी निर्माण व्यवसायी संघको १८ औ साधारणसभा यहि माघ २६ गते हुने भएको छ ।
बुधबार भैरहवामा पत्रकार सम्मेलनको आयोजना गरि संघले साधारणसभा बारे जानकारी गराएको छ । साधारणसभालाई लुम्बिनी प्रदेशका मूख्यमन्त्री चेत नारायण आचार्यले उदघाटन गर्ने संघकी अध्यक्ष मन्जु भुषालले जानकारी दिइन । यस्तै सभामा जिल्लाका अन्य विशिष्ट व्यक्तिहरु संगै निर्माण व्यवसायी महासंघबाट पनि प्रतिनिधित्व हुनेछ ।
संघ स्थापना भएको २८ वर्ष पुगेको अवसरमा संघको सम्पूर्ण गतिविधी समेटिने गरि “लुम्बिनी निर्माण स्मारिका” नामको पुस्तक प्रकाशन गरि सोही दिन विमोचन गरिने भुषालले बताइन । यस्तै सोही अवसरमा संघका पूर्व अध्यक्षहरुलाइ सम्मान कार्यक्रम गरिने उनले बताइन ।
साधारणसभामा नियमित निर्णय संगै हाल विध्यमान निर्माण सामाग्रीहरुको अस्वाभाविक मूल्यवृद्धि एवम निर्माण व्यवसायीहरुको वक्यौता भुक्तानी लगायतका एजेन्डाहरु पनि साधारणसभामा लैजाने तैयारी भएको उनले बताइन ।
लुम्बिनी निर्माण व्यवसायी संघ यस क्षेत्रमा क्रियाशील निर्माण व्यवसायीहरुको संगठन हो । यो सामाजिक उत्तरदायित्व अन्तरगत निरन्तर सामाजिक क्रियाकलापहरुमा समेत संलग्न रहेको छ । शव वाहन सन्चालन देखि अन्य क्रियाकलाप गरिरहेको संघको मूख्य कार्यालय भैरहवा र शाखा कार्यालय बुटवलमा रहेको छ । संघामा ५ सय बढी व्यवसायी आवद्ध छन ।
संघको १८ औ साधारणसभा मणिग्रामको विश्राम वाटिकामा बिहान ८ बजे देखि शुरु हुनेछ । लुम्बिनी निर्माण व्यवसायी संघकी अध्यक्ष मन्जु भुषालको अध्यक्षता एवम महासचिव प्रीतम रौनियारको सन्चालनमा पत्रकार सम्मेलन सम्पन्न भएको थियो ।
