काठमाडौं । जल तथा मौसम विज्ञान विभागले असोज १८ देखि २० गतेसम्म भारी वर्षाको सम्भावना औंल्याएपछि गृह मन्त्रालयले मनसुनजन्य विपद् जोखिम न्यूनीकरणका लागि विशेष परिपत्र जारी गरेको छ। यसअनुसार, राष्ट्रिय विपद् जोखिम न्यूनीकरण तथा व्यवस्थापन प्राधिकरणको सूचनाका आधारमा असोज १८, १९ र २० गते लामो दूरीका र काठमाडौं उपत्यका भित्रिने/बाहिरिने सबै सवारी साधनको आवतजावत पूर्ण रूपमा बन्द गरिनेछ ।
यातायात बन्द: असोज १८, १९ र २० गते लामो दूरीका तथा उपत्यका भित्रिने/बाहिरिने सबै सवारी साधनहरू पूर्ण रूपमा बन्द। यात्रुहरूलाई सहजीकरण: राजमार्गमा रोकिएका यात्रुहरूलाई सडक र मौसमको अवस्था हेरी गन्तव्यसम्म पुर्याउन सहजीकरण गरिनेछ। यसका साथै स्थानीय तह र संघसंस्थाहरूसँगको समन्वयमा खानपानको व्यवस्था गरिनेछ। मानवीय संवेदनशीलता: एम्बुलेन्सलाई सुरक्षित गन्तव्यसम्म पुग्न सहयोग गरिनेछ भने अलपत्र परेका गर्भवती महिलाहरूलाई नजिकको बिरथिंग सेन्टरसम्म पुर्याइनेछ। स्थानान्तरण: बाढी, पहिरोको जोखिममा रहेका व्यक्ति तथा परिवारलाई स्थानीय पालिकासँगको समन्वयमा नजिकको विद्यालय वा खुला स्थानमा स्थानान्तरण गरिनेछ। विमानस्थलका यात्रुहरूका लागि व्यवस्था: उडान स्थगित भई विमानस्थलबाट फर्केका यात्रुहरूका लागि यातायात व्यवसायीसँगको समन्वयमा आवश्यक परिवहनको व्यवस्था मिलाइनेछ। आपत्कालीन सम्पर्क: तत्काल उद्धारको आवश्यकता परेमा गृह मन्त्रालयको शान्ति सुरक्षा तथा अपराध नियन्त्रण शाखामा सम्पर्क गर्न भनिएको छ। २४ सै घण्टा उपस्थिति: बाढी, पहिरो तथा डुबानको जोखिममा रहेका जिल्लाका प्रमुख जिल्ला अधिकारीलगायत सुरक्षा निकायका प्रमुखहरू २४ सै घण्टा कार्यालयमा उपलब्ध हुने व्यवस्था मिलाइनेछ।
