रुपन्देहीको शुद्धोधनमा नयाँ शिवलिङ स्थापना

मर्चवार । रुपन्देहीको शुद्धोधन गाउँपालिका–७ चुन्नीडिहवास्थित शिव मन्दिरमा विधिपूर्वक नयाँ शिवलिङ स्थापना गरिएको छ। जीर्ण र खण्डित अवस्थामा पुगेको पुरानो शिवलिङलाई वैदिक विधिअनुसार विसर्जन गरी समाजसेवी रामजीत लोधको सक्रियतामा नयाँ शिवलिङ प्रतिष्ठा गरिएको हो।

शिवलिङ स्थापनाअघि तीनदिने धार्मिक अनुष्ठान आयोजना गरिएको थियो। भारतबाट ल्याइएको उक्त शिवलिङलाई पर्रोहा परमेश्वर मन्दिरसहित पाँचवटा शिव मन्दिरको परिक्रमा गराई विशेष पूजा–आराधनापश्चात् मन्दिरमा स्थापना गरिएको हो। गोरखपुरस्थित गोरखनाथ मन्दिरबाट आउनुभएका प्रतिष्ठाचार्यका अनुसार शास्त्रीय विधिअनुसार पुरानो खण्डित शिवलिङ विसर्जन गरी प्राण प्रतिष्ठाअघि नयाँ शिवलिङलाई पवित्र मन्दिरहरूमा परिक्रमा गराइएको थियो।

शिवलिङ स्थापना कार्यमा अग्रणी भूमिका निर्वाह गर्नुभएका समाजसेवी रामजीत लोधले आफूले भगवान् शिवप्रतिको आस्था र श्रद्धाका कारण कमाइको केही अंश धार्मिक एवं सामाजिक सेवामा समर्पण गरेको बताउनुभयो। स्थानीयवासीले मन्दिरको व्यवस्थापन सुधार र नयाँ शिवलिङ स्थापनाले धार्मिक आस्था र सामाजिक सद्भाव अभिवृद्धि भएको भन्दै उत्साह व्यक्त गरेका छन्।