भैरहवा । लुम्बिनी साँस्कृतिक नगरपालिका वडा नं. २ मा सडक फराकिलो बनाउने अभियान अन्तर्गत सडक मिचेर निर्माण गरिएका घर टहरा हटाउन सुरु गरिएको छ। वडा अध्यक्ष ईनामुल्लाह फकीरको प्रत्यक्ष उपस्थिति र नेतृत्वमा मुजहना चोकदेखि केवटलिया जाने सडक खण्डमा रहेका अवरोधहरू हटाइएको हो।
लामो समयदेखि सडक सीमा (राइट अफ वे)
भित्र रहेका भौतिक संरचनाका कारण सडक विस्तार र स्तरोन्नतिको काम अगाडि बढ्न सकेको
थिएन। बिहीबार वडा कार्यालयले जे.सी.बी. प्रयोग गरी सडक
पेटीमा रहेका टहरा र अवैध संरचनाहरू भत्काएसँगै सडक निर्माणको बाटो खुलेको छ।
वडाको चौतर्फी विकास र यातायात सहज
बनाउन सडक विस्तारलाई प्राथमिकतामा राखिएको वडा अध्यक्ष फकीरले बताउनुभयो।
"सडक साझा सम्पत्ति हो, यसलाई मिचेर संरचना बनाउँदा दुर्घटनाको जोखिम बढ्नुका साथै विकासमा
अवरोध पुगेको थियो," अध्यक्ष फकीरले भन्नुभयो, "वडावासीको हितका लागि हामीले यो कदम चालेका
हौं र अब सडक निर्माणको कामलाई द्रुत गतिमा अगाडि बढाइनेछ।"
सडक क्षेत्र खाली गराउने अभियानमा
स्थानीय बासिन्दाहरूले समेत समर्थन जनाएका छन्। मुजहना–केवटलिया सडक खण्ड वडाको
महत्वपूर्ण मार्ग मानिन्छ। सडक फराकिलो भएपछि यस क्षेत्रको व्यापारिक गतिविधि र
आवतजावतमा ठूलो सुधार आउने अपेक्षा गरिएको छ।
वडा कार्यालयका अनुसार अवरोध हटाइएका
ठाउँमा तत्कालै सडकको नाला व्यवस्थापन गरिनेछ। यस्तै सडकको स्तरोन्नति र
कालोपत्रेको काम सुरु गरिनेछ । वडा कार्यालयले विकास निर्माणका कार्यमा अवरोध
नगर्न र सडक सीमा पालना गरेर वडालाई नमुना बनाउन सबैमा अपिल समेत गरेको छ।
