बुटवल । सरकारी छापको दुरुपयोग गरी नक्कली लालपुर्जा जारी गरेको आरोपमा मालपोत कार्यालय बुटवलका अधिकृत घनश्याम अर्याल र भैरहवा मालपोत कार्यालयका कार्यालय सहयोगी सञ्जय कुमार केवट पक्राउ परेका छन् । जिल्ला प्रहरी कार्यालय रुपन्देहीले शुक्रबार बिहान उनीहरुलाई पक्राउ गरेको हो ।
जिल्ला प्रहरी कार्यालय रुपन्देहीका सूचना अधिकारी, प्रहरी नायब उपरीक्षक (डीएसपी) गणेश सापकोटाका अनुसार, उनीहरुमाथि पुरानो कित्ताको जग्गासम्बन्धी प्रकरणमा नक्कली कागजात बनाएको आरोप छ । पक्राउ परेका दुवै जनालाई अदालतबाट म्याद थप गरी अनुसन्धान अगाडि बढाइएको सापकोटाले जानकारी दिए । घटनामा संलग्न अन्य केही मालपोत कर्मचारीहरु भने फरार रहेको र उनीहरुको खोजी कार्य जारी रहेको प्रहरीले जनाएको छ ।
