अर्घाखाँची । राष्ट्रिय दलित पत्रकार संघ, नेपाल लुम्बिनी प्रदेशको आयोजना तथा अर्घाखाँची शाखाको समन्वयमा सन्धिखर्कमा खुला तिज गित प्रतियोगिता तथा बृहत साँस्कृतिक कार्यक्रम सम्पन्न भएको छ । कार्यक्रममा ७ वटा समूह तथा विद्यालयको सहभागिता रहेको थियो ।
प्रतियोगितामा सन्धिखर्क नगरपालिका वडा नं १ मा रहेको गौरीशंकर बोर्डिङ स्कुलले प्रथम स्थान हासिल गरेको छ । त्यस्तै, भूमिकास्थान नगरपालिका वडा नं ९ मा रहेको भगवती माध्यमिक विद्यालय द्वितीय र मालारानी गाउँपालिका वडा नं ५ मा रहेको लालीगुराँस आमा समूह तृतीय भएका छन् । सन्धिखर्क नगरपालिका वडा नं २ मा रहेको भद्रिगोला आमा समूहले सान्त्वना स्थान प्राप्त गरेको छ ।
कार्यक्रमका विजेताहरुलाई सन्धिखर्क नगरपालिकाका प्रमुख कृष्ण प्रसाद श्रेष्ठ लगायतका अतिथिहरुले नगद तथा प्रमाणपत्रसहित सम्मान गर्नुभएको थियो । प्रतियोगितामा सहभागीहरुले महिला अधिकार, संविधान कार्यान्वयनमा महिलाको भूमिका र महिलामाथि हुने हिंसाविरुद्धका गीतहरु प्रस्तुत गरेका थिए । कार्यक्रममा राष्ट्रिय स्तरका कलाकारहरु लोक गायक नारायण बिपि परियार, सम्झना रणपाल, विष्णु श्रीपाली, वरिष्ठ डान्सर बबिता धिताल, गायक तथा सर्जक धनराज चुनारा लगायतले आफ्नो प्रस्तुति दिएका थिए ।
कार्यक्रममा सन्धिखर्क नगरपालिकाका प्रमुख प्रशासकीय अधिकृत खिमानन्द भुसाल, नेपाल विद्युत प्राधिकरण अर्घाखाँची वितरण केन्द्रका प्रमुख तिलोचन भट्टराई, विभिन्न राजनीतिक दलका प्रतिनिधि, पत्रकार महासंघका पदाधिकारी, विभिन्न संघसंस्थाका प्रमुख तथा प्रतिनिधिहरुको उपस्थिति रहेको थियो । कार्यक्रम संस्थाका लुम्बिनी प्रदेश अध्यक्ष टेकेन्द्र बस्यालको अध्यक्षता, सचिव अनिल नेपालीको सञ्चालन र केन्द्रीय सदस्य राधा नेपालीको स्वागत मन्तव्यमा सम्पन्न भएको थियो ।
