मर्चवार । रुपन्देहीको मर्चवारीमाई गाउँपालिका–१, सुमेरगढस्थित विभाण्ड एकीकृत कृषि फार्ममा हावाहुरीले व्यापक क्षति पुर्याएको छ । व्यावसायिक कृषक विभाण्ड यादवले लिजमा लिएको करिब १० बिघा जग्गामा लगाएको १० हजार बोट केरामध्ये सोमबार दिउँसो आएको शक्तिशाली हावाहुरीले करिब ३ हजार बोट ढालेको छ ।
विगत ९ महिनादेखि मेहनतपूर्वक हुर्काइएको र आगामी तीन महिनापछि भित्र्याउने तयारीमा रहेको केरा खेती नष्ट हुँदा प्रारम्भिक अनुमानअनुसार करिब ४ लाख रुपैयाँ बराबरको नोक्सानी भएको छ । सबै प्रकारका प्राविधिक स्याहारसुसार गर्दागर्दै पनि प्राकृतिक प्रकोपका कारण बाली भित्र्याएर लगानी उठाउने समयमा ठूलो आर्थिक मार परेको भन्दै कृषक यादवले गहिरो चिन्ता व्यक्त गर्नुभएको छ ।
घटनालगत्तै गाउँपालिका अध्यक्ष गयाप्रसाद बरईले प्रभावित क्षेत्रको स्थलगत निरीक्षण गर्नुभएको छ । उहाँले कृषि शाखाका प्राविधिकसँग समन्वय गरी वास्तविक क्षतिको मूल्यांकनका आधारमा किसानलाई राहत तथा क्षतिपूर्ति उपलब्ध गराउने प्रतिबद्धता जनाउनुभएको छ । यस्तै, गाउँपालिका उपाध्यक्ष एवं अनुगमन समिति संयोजक आशा सिंहले हावाहुरीबाट प्रभावित अन्य किसानहरूलाई पनि क्षतिको विवरण तुरुन्त गाउँपालिकामा गराउन आग्रह गर्दै विवरण संकलन र अनुगमन कार्य सुरु भइसकेको जानकारी दिनुभएको छ ।
कृषि शाखा प्रमुख दिनेश यादवका अनुसार हाल क्षति भएका केराबोटको गणना र लागत मूल्यांकनको कार्य भइरहेको छ र विस्तृत प्रतिवेदन तयार गरी सम्बन्धित निकायमा राहतका लागि सिफारिस गरिनेछ । यस विपत्तिले कृषि क्षेत्रमा बढ्दो जोखिम व्यवस्थापन र किसान संरक्षणका प्रभावकारी कार्यक्रमको टड्कारो आवश्यकतालाई पुनः उजागर गरेको छ ।
