भैरहवा । रुपन्देहीको ओमसतिया गाउँपालिका वडा नम्बर ३ मा एक दिवसीय निःशुल्क आँखा शिविर सम्पन्न भएको छ । वडा कार्यालयको आयोजना र बुटवल लायन्स आँखा अस्पतालको प्राविधिक सहयोगमा सञ्चालित शिविरमा २११ जना सर्वसाधारणले आँखा परीक्षण गराएका छन् ।
परीक्षणका क्रममा मोतिविन्दु र अन्य जटिल समस्या देखिएका ३४ जना बिरामीलाई थप उपचार तथा शल्यक्रियाका लागि अस्पताल पठाइएको छ । शल्यक्रियाका लागि पठाइएका बिरामीहरूको उपचार पूर्ण रूपमा निःशुल्क हुने वडा कार्यालयले जनाएको छ ।
आर्थिक अभावका कारण अस्पतालसम्म पुग्न नसक्ने विपन्न र ज्येष्ठ नागरिकलाई लक्षित गरी गाउँमै सेवा प्रदान गरिएको वडा अध्यक्ष प्रकाश सिंह चौधरीले बताउनुभयो । स्थानीयको आवश्यकतालाई ध्यान दिँदै आगामी दिनमा पनि यस्ता स्वास्थ्य शिविरलाई निरन्तरता दिने वडा कार्यालयको प्रतिबद्धता छ ।
