भैरहवा । भारतबाट अवैध रूपमा भन्सार छली नेपाल भित्र्याइएका करिब २४ लाख रुपैयाँ बराबरका विभिन्न मोडलका आईफोन मोबाइल फोनहरू रुपन्देही प्रहरीले नियन्त्रणमा लिएको छ । विशेष सूचनाका आधारमा इलाका प्रहरी कार्यालय बेलहियाबाट खटिएको प्रहरी टोलीले रुपन्देहीको ओमसतिया गाउँपालिका वडा नं. ४ स्थित सानो बालापुर क्षेत्रमा जाँच गर्ने क्रममा उक्त सफलता हात पारेको हो ।
प्रहरीका अनुसार शंकास्पद अवस्थामा गुडिरहेको लु ५३ प ३३९८ नम्बरको स्कुटरलाई रोकेर चेकजाँच गर्दा बिनाभन्सार भित्र्याइएका ३८ थान महँगा आईफोनहरू फेला परेका थिए । बरामद गरिएका ती मोबाइल फोनहरूको अनुमानित बजार मूल्य करिब २३ लाख ९० हजार रुपैयाँ रहेको जिल्ला प्रहरी कार्यालय रुपन्देहीले जनाएको छ । प्रहरीले मोबाइलसँगै ओसारपसारमा प्रयोग भएको स्कुटरलाई पनि आफ्नो नियन्त्रणमा लिएको छ । नियन्त्रणमा लिइएका सबै मोबाइल र स्कुटरलाई आवश्यक कानुनी कारबाहीका लागि भैरहवा भन्सार कार्यालय बेलहिया पठाउने प्रक्रिया अगाडि बढाइएको प्रहरीको भनाइ छ।
यसैबीच, सीमा सुरक्षा र अवैध तस्करी नियन्त्रणका लागि सीमा क्षेत्रका ठाउँ–ठाउँमा सशस्त्र प्रहरी बलको बाक्लो उपस्थिति र ड्युटी रहँदा–रहँदै पनि यसरी लाखौँ मूल्यका महँगा मोबाइलहरू सीमा पार गराई भित्री इलाकासम्म आइपुग्नु र त्यसलाई नेपाल प्रहरीले पक्राउ गर्नुले स्थानीय स्तरमा निकै चर्चा र चासो जगाएको छ। यस घटनाले सीमा क्षेत्रको सुरक्षा व्यवस्था र निगरानीमाथि समेत सर्वसाधारणबीच विभिन्न प्रश्न र बहस सिर्जना गरिदिएको छ।
