फर्साटिकर । जनउत्थान सामुदायिक लघुवित्त वित्तीय संस्था लिमिटेड, फर्साटिकर शाखाले आफ्नो संस्थागत सामाजिक उत्तरदायित्व अन्तर्गत ५० जना महिलालाई स्वास्थ्य सामग्री वितरण गरेको छ। संस्थाले विभिन्न समूहका ४६ जना महिला सदस्य र ४ जना सामुदायिक महिला स्वास्थ्य स्वयंसेविकालाई सेनेटरी प्याड, डिटोल साबुन, टावेल लगायतका सामग्री हस्तान्तरण गरेको हो ।
सूर्यपुरा माध्यमिक विद्यालयमा आयोजित कार्यक्रममा स्वास्थ्य सामग्री हस्तान्तरण गर्दै गैडहवा गाउँपालिकाका उपाध्यक्ष माधुरी जैसवालले ग्रामीण महिलाहरूको आर्थिक तथा सामाजिक स्तर वृद्धि गर्न लघुवित्तहरूको भूमिका महत्त्वपूर्ण रहेको बताउनुभयो । उहाँले विगतमा उपचारका लागि साहुसँग ऋण माग्नुपर्ने बाध्यतालाई लघुवित्तले अन्त्य गरेको र महिला स्वास्थ्यमा गरिएको यो सहयोगले समाजमा सकारात्मक सन्देश दिने उल्लेख गर्नुभयो । कार्यक्रममा संस्थाका विभागीय प्रमुख इन्द्र बरालीले लघुवित्तलाई नाफा कमाउने थलो मात्र नभई सेवामुखी संस्थाका रूपमा बुझ्न आग्रह गर्नुभयो। उहाँले लिएको कर्जालाई उद्यमशीलतामा लगानी गरी आत्मनिर्भर बन्न सुझाव दिनुभयो।
