रुपन्देहीमा विश्व ध्यान दिवस: ११ हजार बढीले सामूहिक ध्यान गर्ने

भैरहवा । विश्व ध्यान दिवसको अवसर पारेर आगामी पुस ६ गते (२१ डिसेम्बर) का दिन द आर्ट अफ लिभिङले रुपन्देहीका दुई स्थानमा ११ हजारभन्दा बढी व्यक्तिको सहभागितामा बृहत् ध्यान शिविर आयोजना गर्ने भएको छ। 'विश्व शान्ति र सद्भावका लागि ध्यान' भन्ने मूल नाराका साथ आयोजना हुन लागेको यस कार्यक्रम अन्तर्गत भैरहवास्थित नेपाल नालन्दा माविमा एक हजार जना र कञ्चन गाउँपालिकाको दियो खेलमैदानमा १० हजारभन्दा बढी विद्यार्थी, अभिभावक तथा सर्वसाधारणको उपस्थितिमा सामूहिक ध्यान गराइनेछ।

भैरहवामा आयोजित पत्रकार सम्मेलनमा प्रशिक्षकहरूले युवाहरूमा बढ्दो नकारात्मक सोचलाई चिर्न र शारीरिक तथा मानसिक सन्तुलन कायम गर्न ध्यान नै सशक्त माध्यम भएको बताएका छन्। श्री श्री रविशंकरद्वारा स्थापित द आर्ट अफ लिभिङको पहलमा संयुक्त राष्ट्र संघले समेत डिसेम्बर २१ लाई विश्व ध्यान दिवसको रूपमा सर्वसम्मत अनुमोदन गरिसकेको छ। गत वर्ष पहिलो पटक यो दिवस मनाउँदा विश्वभरका ८५ लाखभन्दा बढी मानिसले एकैसाथ ध्यान गरी विश्व कीर्तिमान कायम गरेका थिए। यस पटक रुपन्देहीमा हुन लागेको यस ठूलो स्तरको शिविरले नेपाललाई ध्यानको 'हब' बनाउन र जनमानसमा सकारात्मकता फैलाउन सहयोग पुग्ने आयोजकको विश्वास छ।