भैरहवा - नेपाली काँग्रेसका युवा नेता तथा रुपन्देही क्षेत्र नम्बर ४ का निवर्तमान सांसद प्रमाेदकुमार यादवले मर्चवारमा ट्याक्टर पल्टिँदा घाइते भएकाहरुकाे उपचारमा कुनै कमि हुन नदिन अस्पताल व्यवस्थापनलाई आग्रह गरेका छन् । साथै उनले घाइतेकाे उपचारका लागि सिद्धार्थनगर सिटी अस्पतालमा पुगेर ५० हजार रुपैया सहयाेग गरेका छन् ।
रूपन्देहीकाे काेटहीमाई-५, मा बिहीबार अपरान्ह भागवत पुजाको लागि जल भर्न गइरहेका सर्वसाधारण बाेकेकाे ट्याक्टर पल्टिँदा २३ जना घाइते भएका थिए । ट्याक्टर दुर्घटनाका घाइतेलाई भैरहवास्थित सिटी र भीम अस्पतालमा उपचार भइरहेकाे छ । घाइतेहरु भेट्न अस्पताल पुगेका यादवले उनीहरुकाे स्वास्थ्य अवस्थाबारे जानकारी लिँदै उपचारमा कुनै कमी हुन नदिने विश्वास दिलाए ।
यादवले अस्पतालकाे खातामा तत्काल ५० हजार रुपैयाँ जम्मा गरेर विरामीकाे उपचारका लागि सहयाेग गरेका हुन् । `मैले अस्पताल व्यवस्थापन र उपचारमा संलग्न चिकित्सकलाई भेटेर आर्थिक अभावले उपचारमा कमी नगर्न भनेकाे छु, आवश्यक आर्थिक व्यवस्थापन हाम्राे जिम्मेवारी भयाे, घाइतेले राम्राे र प्रभावकारी उपचार पाउनुपर्छ भन्नेमा ध्यान पुर्याउन आग्रह गरेकाे छु´, उनले भने ।
काेटहीमाइ-७ बाट जल भर्नका लागि सर्वसाधारण बाेकेर गएकाे लु १ त ५५४७ नम्बरको ट्याक्टर कोटहीमाई- ५ मा पल्टिएको हाे । नेता यादवले घाइतेकाे शिघ्रस्वास्थ्यलाभकाे कामना गर्दै आवश्यक सबै सहयाेग गर्ने समेत प्रतिबद्धता जनाएका छन् । अस्पताल व्यवस्थापनले पनि नेता यादवसँग घाइतेकाे उपचारमा कुनै कमी हुन नदिने प्रतिबद्धता जनाएको छ ।
