भैरहवा । आगामी निर्वाचनका लागि नेपाल कम्युनिष्ट पार्टी (ने.क.पा.) ले क्षेत्र नम्बर ५ बाट मोहम्मद वकीलको नाम एक्लो उम्मेदवार का रूपमा सिफारिस गरेको छ। पार्टीको क्षेत्रीय कमिटीले सर्वसम्मत रूपमा वकीललाई प्रतिनिधिसभा सदस्यका लागि सिफारिस गर्ने निर्णय गरेको हो।
पार्टीभित्रका आन्तरिक छलफल र मूल्याङ्कनपछि वरिष्ठ नेता तथा स्थानीय स्तरमा लोकप्रिय रहेका एमडी वकीललाई नै अघि सार्ने निर्णयमा कमिटी पुगेको हो। क्षेत्रीय कमिटीले गरेको यो सिफारिस अब जिल्ला कमिटी हुँदै प्रदेश कमिटीमा पठाइनेछ।
मोहम्मद वकीलको स्थानीय क्षेत्रमा बलियो जनसम्पर्क र राम्रो छवि रहेको छ । उनको पार्टीका लागि लामो समयदेखिको निष्ठावान योगदानलाई कदर गरिएको पार्टीका कार्यकर्ताले प्रतिक्रिया जनाएका छन अन्य आकांक्षीहरूभन्दा उनको जित्ने सम्भावना बलियो रहेको उनिहरुको जिकिर छ ।
यस निर्णयसँगै क्षेत्र नम्बर ५ मा ने.क.पा.बाट अब वकीलले मात्रै टिकटका लागि आधिकारिक दाबी प्रस्तुत गर्न पाउनेछन । यो सिफारिसले अब केन्द्रले उनिलाई टिकट दिने सम्भावना बलियो बनाएको छ। यस क्षेत्रमा ने.क.पा.ले आफ्नो चुनावी तयारीलाई तीव्रता दिएको समेत जनाएको छ ।
