कञ्चन । रुपन्देहीको कञ्चन–४, भैरमघाटमा बालाचतुर्दशी मेलाको अवसरमा वडा अध्यक्ष कप खुल्ला नकआउट फुटबल प्रतियोगिता सुरु भएको छ । कञ्चन आमा समूहको आयोजनामा सञ्चालित प्रतियोगितामा रुपन्देही र कपिलवस्तुका गरी १६ फुटबल समूह सहभागी छन् ।
प्रतियोगिताको उद्घाटन खेलमा निष्पक्ष सुधार केन्द्र, कञ्चन–३ ले भैसाही फुटबल क्लबलाई ३–१ गोल अन्तरले पराजित गर्दै दोस्रो चरणमा प्रवेश गरेको छ । निष्पक्षका लागि रोव परियार, कजी अधिकारी र मिलन रानाले गोल गरे । यस्तै, हिमालय सामुदायिक विकास केन्द्र, कञ्चन–४ ले सिद्धार्थ युवा क्लबलाई हरायो । हिमालयका लागि आकाश थापा र नसिव पुनले गोल गरे ।
कञ्चन गाउँपालिका वडा नं. ४ का वडा अध्यक्ष केशर बहादुर खत्रीले खेलकुदले युवाहरूलाई सामाजिक सेवामा उत्प्रेरित गर्ने बताए । प्रतियोगिताको विजेताले नगद ५० हजार रुपैयाँसहित कप र मेडल प्राप्त गर्नेछ भने उपविजेताले २५ हजार रुपैयाँसहित कप र मेडल पाउने आयोजकले जनाएको छ । साथै, उत्कृष्ट गोल रक्षक, उत्कृष्ट डिफेन्डर, सर्वाधिक गोलकर्ता र उत्कृष्ट खेलाडीलाई पनि पुरस्कृत गरिनेछ । प्रतियोगिता मंसिर ३ गतेसम्म भैरमघाट खेल मैदानमा सञ्चालन हुनेछ ।
