पाल्पा । पाल्पाको सिद्धबाबा क्षेत्रमा पहिरोमा परी एक जनाको मृत्यु भएको छ भने एक जना घाइते भएका छन् । सिद्धार्थ राजमार्ग अन्तर्गत दोभान-३ स्थित सिद्धबाबा मन्दिर नजिक मंगलबार दिउँसो गएको पहिरोले मोटरसाइकल पुर्दा चालकको घटनास्थलमै मृत्यु भएको हो ।
प्रदेश ट्राफिक प्रहरी कार्यालय, बुटवलका अनुसार, बुटवलबाट पाल्पातर्फ जाँदै गरेको लु ५१ प ६६३३ नम्बरको मोटरसाइकल चलाइरहेका पाल्पा रामपुर नगरपालिका– ६, तालपोखराका जनक भण्डारीको पहिरोमा परी मृत्यु भएको हो ।
मोटरसाइकलको पछाडि सवार उनकी श्रीमती कल्पना चापागाईं घाइते भएकी छिन् । घाइते चापागाईंको उपचार भइरहेको प्रहरीले जनाएको छ । सिद्धबाबा क्षेत्र वर्षायाममा पहिरोको उच्च जोखिममा रहने गर्दछ र यस खण्डमा पटक-पटक यस्ता दुर्घटना हुने गरेका छन् ।
