भैरहवा । रुपन्देही प्रहरीले जिल्लाको सुरक्षा व्यवस्थालाई कडा पार्ने उद्देश्यले सञ्चालन गरेको 'विशेष स्वीप अपरेशन' अन्तर्गत थप ८३ जनालाई नियन्त्रणमा लिएको छ। शान्ति सुरक्षामा खलल पुर्याउने गतिविधिमा संलग्न रहेको आशंकामा प्रहरीले जिल्लाका विभिन्न स्थानबाट उनीहरूलाई नियन्त्रणमा लिएको हो।
जिल्ला प्रहरी कार्यालय रुपन्देहीका प्रवक्ता एवं प्रहरी नायब उपरीक्षक (डीएसपी) गणेश सापकोटाका अनुसार आइतबार बेलुका ६ बजेदेखि राति १० बजेसम्म चार घण्टा सघन रूपमा चलाइएको चेकजाँचका क्रममा यी व्यक्तिहरू पक्राउ परेका हुन्। यसअघि शनिबार मात्रै प्रहरीले दुई घण्टाको छोटो अवधिमा चलाएको अपरेशनका क्रममा १०३ जनालाई नियन्त्रणमा लिएको थियो। योसँगै पछिल्लो दुई दिनमा मात्रै रुपन्देही प्रहरीको नियन्त्रणमा पुग्नेहरूको संख्या १८६ पुगेको छ।
पक्राउ परेका सबै व्यक्तिहरूले समाजको शान्ति सुरक्षामा खलल पुर्याएको प्रहरीको दाबी छ। यद्यपि, प्रहरीले हालसम्म नियन्त्रणमा लिइएका १८६ जनाकै नाम, थर र ठेगाना भने सार्वजनिक गरेको छैन। पक्राउ परेका व्यक्तिहरूमाथि विभिन्न आपराधिक गतिविधिमा संलग्नता रहे/नहेरेको विषयमा सूक्ष्म अनुसन्धान भइरहेको जिल्ला प्रहरी कार्यालयले जनाएको छ।जिल्लामा अवाञ्छित गतिविधि नियन्त्रण गर्न र नागरिकलाई सुरक्षाको प्रत्याभूति दिलाउन प्रहरीले यस्तो स्विप अपरेशनलाई निरन्तरता दिँदै आएको छ। विशेषगरी रात्रिकालीन समयमा हुने उच्छृङ्खल गतिविधि र सम्भावित अपराध रोक्न प्रहरीले आफ्नो सक्रियता बढाएको देखिन्छ।
