बुटवल । लगातारको वर्षापछि खसेको पहिरोका कारण सिद्धार्थ राजमार्गको बुटवल–पाल्पा सडकखण्ड पूर्ण रुपमा अवरुद्ध भएको छ । पाल्पाको तिनाउ गाउँपालिका–३ दोभानस्थित सिद्धबाबा क्षेत्रमा आज बिहानैदेखि परेको वर्षाले ढुङ्गासहितको पहिरो झरेपछि सडक अवरुद्ध भएको हो । राजमार्ग सुरक्षा तथा ट्राफिक व्यवस्थापन कार्यालय बुटवलका अनुसार सिद्धबाबाको जोखिमपूर्ण क्षेत्रमा पहिरो खसेका कारण सवारी साधनहरु बीच बाटोमै रोकिएका छन् ।
वर्षा नरोकिएका कारण सडक पन्छाउने कार्यमा समेत कठिनाइ भइरहेको छ । यसैगरी, पूर्व-पश्चिम राजमार्ग अन्तर्गत पर्ने दाउन्ने सडकखण्डमा पनि सवारी आवागमन प्रभावित भएको छ । अविरल वर्षाका कारण दाउन्नेको सडक अत्यन्तै चिप्लो भएपछि सवारी साधनहरु गुड्न नसक्दा दुवैतर्फको बाटो पूर्ण रुपमा अवरुद्ध भएको प्रहरीले जनाएको छ । दाउन्नेमा बाटो अवरुद्ध भएपछि सवारी साधनहरुलाई पाल्पा रुट हुँदै डाइभर्सन गरिएको भए पनि सिद्धार्थ राजमार्गको सिद्धबाबा क्षेत्रमा समेत पहिरो खसेपछि यात्रुहरु थप मर्कामा परेका छन् ।
दुवै वैकल्पिक मार्गहरु बन्द हुँदा बुटवलबाट पश्चिमतर्फ जाने र विभिन्न जिल्लाबाट बुटवल भित्रिने सयौँ सवारी साधन र यात्रुहरु सडकमै अलपत्र परेका हुन् । अहिले पनि वर्षा जारी रहेकाले सडक तत्काल खुल्ने सम्भावना कम देखिएको छ । वर्षा रोकिएपछि मात्र पहिरो पन्छाएर सडक सञ्चालन गर्न केही घण्टा लाग्ने प्रहरीले जानकारी दिएको छ । ट्राफिक प्रहरीले सडकको अवस्था बुझेर मात्र यात्रा तय गर्न सर्वसाधारणलाई आग्रह गरेको छ ।
