ओमसतिया । भिन्तुना नेवा: खल ओमसतियाको आयोजनामा पहिलो पटक ऐतिहासिक लाखे नाच कार्यक्रम सम्पन्न भएको छ। ओमसतिया गाउँपालिकाको मुख्य प्रायोजन तथा वडा नं. १, २ र सियारी गाउँपालिका वडा नं. १ को सह-प्रायोजनमा ओमसतियाको ठुटिपिपलमा उक्त कार्यक्रम आयोजना गरिएको हो ।
राति अबेरसम्म चलेको कार्यक्रममा स्थानीय कलाकारहरूले नेवारी भेषभुषामा सजिएर परम्परागत लाखे नाच प्रस्तुत गरेका थिए। कार्यक्रमले स्थानीय स्तरमा ठूलो उत्साह जगाएको थियो । कार्यक्रमलाई सम्बोधन गर्दै ओमसतिया गाउँपालिकाका अध्यक्ष मन्जित कुमार यादव (सोनु) ले समाजमा रहेका सबै जातजाति र भाषाभाषीको संस्कृतिको संरक्षण गर्न गाउँपालिका प्रतिबद्ध रहेको बताउनुभयो। यस क्षेत्रमा पहिलो पटक आयोजना भएको यस्तो कार्यक्रमले आफूलाई अत्यन्तै उत्साहित बनाएको उहाँले उल्लेख गर्नुभयो ।
यस्तै, गाउँपालिकाकी उपाध्यक्ष सुनिता चौधरीले धर्म र संस्कृतिको रक्षाका लागि भिन्तुना नेवा: खलले गरेको यो प्रयास प्रशंसनीय रहेको बताउनुभयो। उहाँले आगामी दिनहरुमा अझ भव्य कार्यक्रम आयोजना गर्न गाउँपालिकाले सहयोग गर्ने प्रतिबद्धता व्यक्त गर्नुभयो।
भिन्तुना नेवा: खल ओमसतियाका अध्यक्ष ज्ञानेश श्रेष्ठको अध्यक्षतामा सम्पन्न भएको कार्यक्रममा संस्कृतिको संरक्षण र समाजलाई एकीकृत गराउने उद्देश्यले पहिलो पटक यो कार्यक्रम आयोजना गरिएको बताउनुभयो। उहाँले आगामी वर्षहरूमा यसलाई अझ परिष्कृत र भव्य बनाउँदै लैजाने अठोट व्यक्त गर्नुभयो।
कार्यक्रममा वडा अध्यक्षहरु बेल बहादुर बराल, सित्तल जिटी, अरुण कुमार शाही, महिला सदस्य गंगा थापा, संस्थाका संस्थापक अध्यक्ष जानकी पासी, फोनिजका वरिष्ठ उपाध्यक्ष सरु राना लगायतको उपस्थिति रहेको थियो । कार्यक्रम कमल मनाधरको स्वागत मन्तव्यबाट सुरु भई आरोग्य जोशीले सञ्चालन गर्नुभएको थियो।
