जनकपुरधाम । मौसम विभागले असोज १७ गतेदेखि २० गतेसम्म मधेश प्रदेश लगायत अन्य प्रदेशहरूमा भारी वर्षाको सम्भावना रहेको भन्दै उच्च सतर्कता अपनाउन आग्रह गरेको छ। यस अवधिको वर्षाले नदी किनार, खोलानाला, सडक र बस्तीहरूमा बाढी, कटान र अन्य आकस्मिक परिस्थितिहरू सिर्जना गर्न सक्ने पूर्वानुमान गरिएको छ ।
जनताको जीवन र सुरक्षालाई प्राथमिकतामा राख्दै प्रदेश सरकारले सम्बन्धित सबै निकायलाई आवश्यक तयारी र सतर्कता अपनाउन निर्देशन दिइसकेको छ। प्रदेश सरकारले नदी किनार, संवेदनशील क्षेत्र र जोखिमयुक्त स्थानमा नजान, अत्यावश्यक बाहेक यात्रा नगर्न र सुरक्षित रहन हार्दिक अनुरोध गरेको छ। स्थानीय प्रशासन, आपतकालीन टोली, सुरक्षाकर्मी र स्वास्थ्यका टोलीहरूलाई जनताको सुरक्षा र राहतका लागि पूर्ण रूपमा तत्पर रहन निर्देशन दिइएको छ।
यसैगरी, प्रदेशमा क्रियाशील गैरसरकारी संस्थाहरू, स्वयंसेवक समूहहरूलाई विपद्बाट सिर्जना हुने जोखिम न्यूनीकरणमा सहयोग गर्न आग्रह गरिएको छ । प्रदेश सरकारले सबै नागरिकलाई यस अवधिभर सचेत रहन, आफ्नो र परिवारको सुरक्षा सुनिश्चित गर्न र आपसी सहयोग, समझदारी तथा संयम कायम राख्न अनुरोध गरेको छ।
