कञ्चन, रुपन्देही । रुपन्देहीको कञ्चन–४, अस्नैया स्थित निश्चल कृषि सहकारी संस्था लिमिटेडको ११ औं वार्षिक साधारण सभा सम्पन्न भएको छ । सभाले संस्थाका अध्यक्ष जगीलाल थापाद्वारा प्रस्तुत वार्षिक प्रगति प्रतिवेदन, लेखा सुपरिवेक्षण समितिका संयोजक ठाकुर गौतमको प्रतिवेदन र कोषाध्यक्ष कल्पना रानाद्वारा प्रस्तुत आर्थिक प्रतिवेदन तथा आगामी आर्थिक वर्षको अनुमानित आय–व्यय सर्वसम्मतले अनुमोदन गरेको छ ।
कार्यक्रमको उद्घाटन गर्दै कञ्चन–४ का वडा अध्यक्ष केशर बहादुर खत्रीले परम्परागत कृषि प्रणालीलाई आधुनिकीकरण र व्यावसायिक बनाउन सहकारीले योजना बनाउनुपर्नेमा जोड दिनुभयो। उहाँले किसानका उत्पादनको बजारीकरणका लागि 'सहकारी पसल' सञ्चालन गर्न सके शेयर सदस्यहरूमा उत्साह थपिने बताउनुभयो ।
यस्तै, कार्यपालिका सदस्य सुशिला थापाले यस सहकारीले जग्गा र किसान कार्डको आधारमा रासायनिक मल वितरण गर्ने गरेको नमुना कार्यलाई पालिकाले समेत अवलम्बन गरेको भन्दै प्रशंसा गर्नुभयो । कार्यक्रममा संस्थापक अध्यक्ष उजरसिंह दर्लामी र प्रारम्भिक भेलाका अध्यक्ष विनोद कुमार पुनले संस्थाको विगत र वर्तमान प्रगतिको चर्चा गर्नुभएको थियो।
सो अवसरमा एसईई र कक्षा १२ लगायत प्राविधिक विषयमा उत्तीर्ण शेयर सदस्यका छोराछोरी तथा पूर्व सञ्चालक र समिति सदस्यहरूलाई सम्मान गरिएको थियो। संस्थाका अध्यक्ष जगीलाल थापाको अध्यक्षतामा सम्पन्न उक्त कार्यक्रममा उपाध्यक्ष केशरसिंह रानाले स्वागत मन्तव्य राख्नुभएको थियो भने सञ्चालन सचिव दुर्गा रानाले गर्नुभएको थियो।
