रौतहट । अख्तियार दुरुपयोग अनुसन्धान आयोगले रौतहटको श्री जय किसान माध्यमिक विद्यालय धरहरीका प्रधानाध्यापक सञ्जय प्रसाद र बिचौलिया अरविन्द प्रकाश साहकानुलाई ४ लाख ५० हजार रुपैयाँ घुससहित पक्राउ गरेको छ। शिक्षक नियुक्ति प्रक्रियामा घुस मागेको सूचनाका आधारमा अख्तियारको टोलीले उनीहरूलाई नियन्त्रणमा लिएको हो ।
अख्तियार दुरुपयोग अनुसन्धान आयोग, टंगालबाट खटिएको टोलीले सेवाग्राहीबाट घुसबापतको रकम लिइसकेको अवस्थामा उनीहरूलाई पर्सा जिल्ला, वीरगञ्ज महानगरपालिका वडा नं. १३ अदालत रोडस्थित एक होटलबाट नियन्त्रणमा लिएको हो।
प्रवक्ता राजेन्द्र कुमार पौडेलले जारी गरेको प्रेस विज्ञप्ति अनुसार, विद्यालयले खुलाएको शिक्षक विज्ञापनमा सेवाग्राहीले रितपूर्वक दरखास्त दिएका थिए। सोही क्रममा प्रधानाध्यापक सञ्जय प्रसादले बिचौलिया अरविन्द प्रकाश साहकानुमार्फत ४ लाख ५० हजार रुपैयाँ घुस/रिसवत माग गरेको उजुरी अख्तियारमा परेको थियो । अख्तियारले दुवै जनालाई नियन्त्रणमा लिई थप अनुसन्धान गरिरहेको जनाएको छ।
