काठमाडौं । मोटरसाइकलको स्वरुप परिवर्तन गरी चर्को आवाज निकालेर ध्वनी प्रदुषण गराउने २७ वटा मोटरसाइकल चालकलाई ट्राफिक प्रहरीले कारवाही गरेको छ ।
नियमित चेकजाँचमा निरन्तर रुपमा कारबाही गर्दै आएकोमा गत शुक्रबार देखि काठमाडौं उपत्यका ट्राफिक प्रहरी कार्यालयले अभियाननै संचालन गरेर स्वरुप परिवर्तन गरी चलाउने सवारी साधनका चालकलाई कारवाही गरेको हो ।
जथाभावी रुपमा साइलेन्सर, लाइट, नम्बर प्लेट, लुकिङ ग्लास, सक, हेण्डिल लगायतका पुर्जाहरूलाई परिवर्तन गरी मोटरसाइकल चलाउँदा सवारी दुर्घटना हुने भएकाले ट्राफिक प्रहरीले चेकजाँचलाई तिब्रता दिएको हो ।
स्वरुप परिवर्तन गरी चलाइएका सवारी साधनबाट निस्कने चर्कोे आवाजले वृद्धवृद्धा, बालबालिका र संवेदनशील क्षेत्र (स्कुल तथा अस्पताल) मा प्रत्यक्ष असर पर्ने तथा ध्वनि प्रदुषण समेत हुने हुँदा त्यस्ता सवारी साधनलाई कारवाही गरिएको काठमाडौं उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्र प्रसाद भट्टले जानकारी दिए ।
कारबाहीमा परेका मोटरसाइकलमा फेरिएका पार्टपुर्जा निकाली मापदण्ड अनुरुप राख्न लगाइएको पनि प्रवक्ता भट्टले जानकारी दिए । सवारी तथा यातायात व्यवस्था ऐन २०४९ मा सवारी साधनको स्वरुप परिवर्तन गरी सवारी साधन चलाउदा १,००० देखी १५,००० सम्म जरिवाना हुने व्यवस्था रहेको छ ।
