भैरहवा । सशस्त्र प्रहरी बलले रुपन्देहीको सिद्धार्थनगरबाट रु २५ लाख ६५ हजार नौ सय बराबरको भन्सार छलीको अवैध सामान र कार नियन्त्रणमा लिएको छ । सशस्त्र प्रहरी बल नेपाल सीमा सुरक्षा गुल्म हे.क्वा. डण्डा रुपन्देहीका सशस्त्र प्रहरी नायव उपरीक्षक गोपिकृष्ण भट्टराईको नेतृत्वमा खटिएको टोलीले सिद्धार्थनगर नगरपालिका–१ पिपलबोटबाट उक्त सामान र सवारी साधन नियन्त्रणमा लिएको हो।
भारतबाट नेपालतर्फ आउँदै गरेको २४ बिएच ०३०९ के नम्बरको भारतीय रातो कार प्रहरी टोलीलाई देख्नासाथ भागेपछि पिछा गर्ने क्रममा सिद्धार्थनगर–३ स्थित आँखा अस्पताल चोकमा चालक कार छाडेर फरार भएका थिए। उक्त गाडीलाई नियन्त्रणमा लिई खानतलासी गर्दा रु ६५ हजार नौ सय बराबरको ३२ बोतल विभिन्न ब्रान्डका रक्सी तथा किराना सामान फेला परेको छ। बरामद गरिएको सामान र ढुवानीमा प्रयोग भएको रु २५ लाख मूल्य बराबरको कारसहित कूल रु २५ लाख ६५ हजार नौ सय बराबरको बिगो आवश्यक कारबाहीका लागि भन्सार कार्यालय बुझाउने प्रक्रिया अघि बढाइएको सशस्त्र प्रहरीले जनाएको छ।
