भैरहवा । राष्ट्रिय कर दिवस २०८२ को अवसरमा आन्तरिक राजस्व कार्यालय भैरहवाले शुभकामना आदानप्रदान तथा करदाता सम्मान कार्यक्रम सम्पन्न गरेको छ। भैरहवाको सिद्धार्थ उद्योग वाणिज्य संघको सभाहलमा आयोजित कार्यक्रममा विभिन्न संघसंस्थाका प्रतिनिधि, उद्योगी व्यवसायी र सञ्चारकर्मीहरूको उपस्थिति थियो ।
कार्यक्रममा रुपन्देहीका सहायक प्रमुख जिल्ला अधिकारी मेघनाथ पाध्याले आन्तरिक राजस्व कार्यालय भैरहवाले सरकारले दिएको लक्ष्यभन्दा बढी राजस्व असुली गरी उत्कृष्ट कार्य गरेकोमा खुशी व्यक्त गर्नुभयो। उहाँले समाजको रुपान्तरणमा राज्यका निकायसँग स्थानीय उद्योगी व्यवसायीहरूको भूमिका महत्वपूर्ण हुने बताउनुभयो।
आन्तरिक राजस्व कार्यालय भैरहवाका प्रमुख राजस्व अधिकृत प्रेमराज पोख्रेलले सम्पूर्ण उद्योगी व्यवसायीलाई राष्ट्रिय कर दिवस २०८२ को शुभकामना दिँदै करदाताको सहयोग र सहकार्यले चालु आर्थिक वर्षमा लक्ष्यभन्दा बढी कर असुल गर्न सफल भएको बताउनुभयो । उहाँले कर प्रशासनले करदातालाई दुःख दिने नभई सहजीकरण गर्ने बताए । केही महिनाभित्रै क्यूआर कोडमार्फत कर तिर्न मिल्ने प्रणालीको विकास हुने जानकारी पनि उहाँले दिनुभयो ।
सिद्धार्थ उद्योग वाणिज्य संघ रुपन्देहीका अध्यक्ष नेत्र प्रसाद आचार्यले राज्यले कर असुली गरे पनि उद्योगी व्यवसायीलाई पर्याप्त सुविधा नदिएको बताउनुभयो । उहाँले कर प्रणाली स्वेच्छिक हुनुपर्ने र करबाट संकलित रकम स्वास्थ्य, शिक्षा र रोजगारमा लगानी हुनुपर्नेमा जोड दिनुभयो ।
उद्योग व्यापार संगठन रुपन्देहीका अध्यक्ष सचिन रोक्का, सिद्धार्थ सञ्चालका अध्यक्ष अनिल कुमार ज्ञवाली, तिलोत्तम उद्योग वाणिज्य संघका वरिष्ठ उपाध्यक्ष सुरज पंगेनी र वरिष्ठ लेखा परीक्षक शिवहरी शर्माले कर प्रणालीमा सुधार, पारदर्शिता र व्यवसायीमैत्री वातावरणको आवश्यकता औंल्याए ।
