रामेछाप । नेपालमा केही काम छैन, केही काम पाईँदैन वा केही हुँदैन भन्नेलाई रामेछापको मन्थली नगरपालिका–१४ फुलासीका एक युवाले राम्रै जवाफ दिएका छन् । फुलासीका चिनाकुमार तामाङ रउनकी पत्नी अनिता तामाङले गाउँमा नै फलफूलको नर्सरी राखेर मेहनत गर्ने हो भने गाउँमा प्रशस्त अवसर छ भन्ने उदाहरण प्रस्तुत गरेका छन् । देशमा केही अवसर छैन भनेर विदेशमा एकथरि युवाले पसिना बगाइरहँदा तामाङ दम्पती गाउँमा नै रमाइरहेका छन् ।
१० वर्ष अघि सुरु भएको युवा एग्रिकल्चर फार्म अहिले देशभरि बिरुवा बिक्री गर्ने फार्म बनेको छ । त्यही फार्ममा तामाङ दम्पती रमाइरहेका छन् । फार्ममा अहिले विभिन्न जातका ३० हजार भन्दा बढी तयारी बिरुवा रहेका छन् । नर्सरीमा जापनिज हलुवाबेद, सुन्तला, मुन्तला, जुनार, ओखर, किवी, बुद्धचित्त लगायतका बिक्रीका लागि तयारी बिरुवा छन् । सो नर्सरीका बिरुवा देश भरि पुग्ने अनिता बताउँछिन् । ‘नेपाल भरि नै जान्छ, कोही नर्सरीमा नै आएर बिरुवा किन्छन्, धेरैले फोनबाटै सम्पर्क गर्छन्, हामी नर्सरीबाट बिरुवा पठाइदिन्छौँ’, उनले भनिन् ।
नर्सरीमा आफू मात्र है तामाङ दम्पतीले अन्यलाई पनि रोजगारी दिएको छ । बिरुवा लगाउने, गोडमेल गर्ने, बिरुवा ओसार्ने बेलामा अन्य मान्छेहरू लगाएर काम गर्ने गरेको तामाङले बताए । नर्सरीबाट मेहनत अनुसार राम्रै कमाइ हुने चिनाकुमार बताउँछन् । ‘विदेश जानु परेको छैन, आफ्नै गाउँमा बसिएको छ, रमाइएको छ, मेहनत अनुसार ठिकै छ’, उनले भने ।
